Wilder-Joshuan/ Dueli mbetet “peng” i parave

Deontay Wilder nuk ka ndërruar mendje sa i përket duelit me Joshuan. Amerikani vazhdon ti qëndrojë faktit se fitimet duhet të ndahen 50 me 50, ose nuk do të zhvillohet kurrë. “Ky është çmimi im”, tha Wilder, kampion bote në peshat e rënda në kategorinë WBC, ndërsa Joshua mban titujt kampionë bote në kategoritë IBF dhe WBA. “Ose fitimi do të ndahet 50% me 50%, ose nuk keni për të parë kurrë këtë përballje për unifikimin e titujve. Nëse ata duan të përdorin shtigjet për të evituar autostradën, atëherë le të vazhdojnë në atë rrugë”, u shpreh më tej Wilder.“Unë nuk po kërkoj më shumë, unë po them 50% me 50%. Ne mund të flasim për shifrat të tjera, 60-40 vetëm në rast të një revanshi, atëherë mund të bëjmë kompromise”, deklaroi kampioni amerikan i botës, i pamposhtur në ring ashtu si Joshua. “Unë nuk e di nëse do të përballemi, presioni nuk bie mbi mua, unë e kam bërë ofertën time. Unë do ta hedh KO Joshua dhe mos u befasoni kur ta shihni atë në tapet që në raundin e parë”, u shpreh më tej boksieri amerikan Deontay Wilder, që ashtu si Joshua kërkon unifikimin e titujve kampionë në peshat e rënda.