Wenger shpreson, Aubameyang zbraz dollapin në kampin stërvitor

Fati për sulmuesin nga Gaboni të Dortmund duket se është vendosur. Pierre-Emerick Aubameyang ka qenë i lidhur me një lëvizje në “Emirates” në javët e fundit dhe kjo lëvizje pritet të bëhet para mbylljes së afatit kalimtar të janarit.

Shefi i Topçinjve, Ivan Gazidis, ka mbajtur takime me krerët e BVB-së gjatë këtyre ditëve dhe duket se kanë arritur një akord final, duke parë edhe gatishmërinë që ka treguar lojtari për këtë lëvizje. Arsene Wenger ka pranuar se arritja e marrëveshjes është e mundshme, ndërkohë që flitet se Olivier Giroud mund të shkojë në drejtim të kundërt. Dortmundi kërkon përfshirjen e sulmuesit francez në marrëveshje për ta lejuar largimin e 28-vjeçarit.

Në ndërkohë, Aubameyang është fotografuar duke e ngarkuar veturën e tij me sende personale të vendosura në kutia, pas largimit nga stërvitjet. Te Arsenali, sulmuesi do ta gjejë ish-bashkëlojtarin e tij, Henrikh Mkhitaryan, i cili kaloi te Topcinjtë në kuadër të marrëveshjes për transferimin e Alexis Sanchezit te Manchester Unitedi. Wenger e kërkon Aubameyangun pikërisht për ta zënë vendin e sulmuesit kilian, i cili zgjodhi ta vazhdojë karrierën në Old Trafford.