Barazimi 2-2 me Burnley në “Old Trafford” ka lënë një shije mjaft të keqe për bosin e United, Jose Mourinho. I cili në konferencën pas ndeshjes u shpreh se buxheti prej 300 milionë stërlina që ai kishte pasur në dispozicion për të afruar lojtarë, nuk ka qenë i mjaftueshëm për të garantuar siguri dhe vazhdimësi për ekipin. Tashmë Manchester United mbetet në vendin e dytë por diferenca me Cityn e Guardiolas është 12 pikë dhe një ndeshje më pak për kryesuesit.
“Ky është sezoni i dytë që po tentojmë të ndërtojmë një skuadër të fortë, sepse siç e dini Manchester United nuk është ekipi më i fortë në botë. Ne jemi një ekip i madh, por 300 milionë paund nuk janë të mjaftueshme për të realizuar ato objektiva që kemi vendosur. Djemtë tanë janë duke bërë maksimumin, por kjo sërish nuk mjafton.”
Por kësaj deklarate i është përgjigjur menjëherë trajneri i Arsenal, Arsen Wenger. Ky i fundit është shprehur se ka plot 21 vite që konkurron me ekipe që kanë një buxhet shumë herë më të madh se ai, por prapë nuk është dorëzuar dhe ka arritur të marrë suksese.
“Mjaft me ankesa. Mourinho duhet të pajtohet me idenë se Manchester City është një klub më i pasur nga United. Çdo trajner duhet të arrijë të menaxhojë situatën në të cilën ndodhet e jo të shohë përtej mundësive konkrete që ka. Duhet gjetur rruga drejt suksesit me ata futbollistë që kemi në dispozicion. Unë kam mësuar të bashkëjetoj me faktet dhe kjo nuk më është kthyer në pengesë, përkundrazi. Mendoj se dhe Mourinho duhet ta shohë në këtë prizëm të gjithë këtë situatë e të bëjë më mirë detyrën e tij.”
Gjithësesi, edhe pse Wenger është me këmbë në tokë, modest dhe i kënaqur me arritjet përgjatë viteve, këtë sezon duhet kujtuar se Arsenali renditet i gjashti në tabelën e klasifikimit të Premier League-s. Ndërkohë që “Djajtë e Kuq” tashmë me një distancë të thellë prej 12 pikësh ndaj “Citizens” vijojnë të renditen të dytët, me vetëm një pikë më shumë se Chelsea i vendit të tretë.
