Duke analizuar ngjarjet e fundit, Washington Post, shkruan se sulmi i forcave amerikane hap mundësinë e konfliktit të drejtpërdrejtë mes Rusisë dhe Shteteve të Bashkuara në Siri. Rusia ka forca në terren dhe sisteme të afta për të rrëzuar aeroplanët dhe raketat amerikane.
Ushtarët rusë janë të përzier me forcat siriane – në baza dhe në vijën e frontit – ndaj çdo sulm ndaj bazave ushtarake siriane mund të rrezikojë jetët e tyre. Megjithatë, Pentagoni raporton se planifikuesit ushtarakë amerikanë kanë marrë parasysh të gjitha masat për të zvogëluar rrezikun e viktimave ruse.
Zëdhënësja e Ministrisë së Jashtme ruse, Mariha Zakharova, hodhi poshtë akuzat se sulmi amerikan ishte kundërpërgjigje ndaj përdorimit të armëve kimike nga Assadi, duke shtuar se fjala është për “demonstrim të forcës paraprakisht të planifikuar”.
“Gjasat janë shumë të mëdha për konflikt midis Rusisë dhe Shteteve të Bashkuara, e pasojat mund të jenë serioze, përfshirë konfliktin ushtarak”, ka thënë Mikhail Yemelyanov, anëtar i Dhomës së Ulët të Parlamentit rus, duke shtuar se sulmi i dha mesazh të gabuar opozitës siriane për të minuar procesin e paqes.
Në dhjetë vitet e fundit, marrëdhëniet ruso-amerikane kanë qenë në nivel të keq. Presidentin amerikan, Donald Trump, rusët e kanë kritikuar se pse nuk e ka kontaktuar Putinin, edhe për t’ia shprehur ngushëllimet për sulmin terrorist në një metro në Shën Petersburg.
