Presidenti Serbisë, Aleksandër Vuçiç, do të udhëtojë javën e ardhshme në Shtetet e Bashkuara të Amerikës, për t’u takuar me zëvendëspresidentin e SHBA-ve, Mike Pence.
Por, një nga çështjet që Vuçiç kërkon të anashkalojë në takimin me Pence është vrasja e 3 vëllezërve shqiptaro-amerikanë përgjatë luftës së Kosovës.
Ylli, Agron dhe Mehmet Bytyçi udhëtuan drejt Kosovës për të luftuar përkrah Ushtrisë Çlirimtare të Kosovës në vitin 1999.
Ata u kapën dhe u vranë duke u hedhur në një prej varreve masive në Serbi. Trupat e tyre ende nuk janë gjendur dhe Serbia nuk ka dhënë asnjë shpjegim për vrasjen e tyre.
Ndërkaq, në 18-vjetorin e vrasjes së djemve të tyre, familja Bytyçi akuzon Presidentin e Serbisë, Aleksandër Vuçiç, se po mbron vrasësin, ish-drejtuesin e policisë serbe Goran “Guri” Radosavljeviç.
‘‘Ai ka refuzuar t’u përgjigjët kërkesave tona për të rishikuar çështjen për rreth dy vjet, vetëm për të mbrojtur Radosavljeviç. Ai ka hedhur poshtë në mënyrë të padrejtë “provat e reja” para pikave të rëndësishme diplomatike, vetëm për të mbrojtur Radosavljeviç’’, shkruan familja Bytyçi në letrën e saj.
Për këtë arsye, familja Bytyçi e cila jeton në SHBA, ndërsa akuzon Vuçiçin që nuk ka bërë asgjë për zbardhjen e kësaj çështjeje i kërkon atij që ta marrë me vete Guri Radosavljeviç, duke i ofruar edhe biletën e avionit. ‘‘Meqenëse Guri Radosavljeviç është kaq i rëndësishëm për ty, ne kemi një kërkesë: sille Gurin në Ëashington. Sille të takohet me zëvendëspresidentin Pence dhe zyrtarët e degëve të qeverisë. Ja blejmë ne biletën!’’, përfundon letra e familjes Bytyçi.
Deklarata e familjes Bytyçi në 18-vjetorin e vrasjes së tre djemve të tyre:
Para 18 vitesh, tre nga djemtë dhe vëllezërit tanë, Ylli, Agron dhe Mehmet Bytyçi, u torturuan, u vranë dhe u hodhën në një prej varreve masive në Serbi. Vrasësit e tyre dinin vetëm dy gjëra për ta; ata ishin shqiptarë të Kosovës, dhe amerikanë. Familja jonë i njihte si njerëz dashamirës dhe besnikë, të cilët e donin Amerikën dhe u shpërngulën atje nga tragjedia e papërshkrueshme që ndodhi në Kosovë, madje në oborrin e shtëpisë së nënës së tyre.
Presidenti serb Aleksandër Vuçiç. do të jetë javës tjetër në Washington D.C. në një vizitë në Shtëpinë e Bardhë, me zëvendëspresidentin Mike Pence.
Pasi i tha familjes tonë dhe ambasadorit të SHBA-ve, Kyle Scott, se ne duhet të na vijë turp të vëmë në dyshim besnikërinë e tij ndaj të dyshuarit kryesor, Goran “Guri” Radosavljeviç, Presidenti Vuçiç ka shumë përgjigje për të dhënë.
- Ai ka premtuar vazhdimisht se do ta zgjidhë çështjen, vetëm për të mbrojtur Radosavljeviç.
- Ai ka refuzuar t’u përgjigjet kërkesave tona për të rishikuar çështjen për rreth dy vjet, vetëm për të mbrojtur Radosavljeviç.
- Ai ka hedhur poshtë në mënyrë të padrejtë “provat e reja” para pikave më të rëndësishme diplomatike, vetëm për të mbrojtur Radosavljeviç.
- Ai nuk ka ndërmarrë asnjë hap të besueshëm për të inkurajuar dhe mbrojtur dëshmitarët, vetëm për të mbrojtur Radosavljevic.
- Ai ka vënë në rrezik reputacionin e Serbisë dhe reputacionin e tij, vetëm për të mbrojtur Radosavljeviç.
President Vuçiç, s’ka pse të na vijë turp për asgjë.
Meqenëse Guri Radosavljeviç është kaq i rëndësishëm për ty, ne kemi një kërkesë: sille Gurin në Washington. Sille të takohet me zëvendëspresidentin Pence dhe zyrtarët e degëve të qeverisë. Ja blejmë ne biletën!
TIRANA TODAY
