Zbardhet pas pothuajse një viti vrasja e një 57-vjeçari në Mallakastër. Ngjarja ka ndodhur më 29 nëntor 2016, kur një bari gjeti trupin e pajetë të Shefo Durajt, teknolog i uzinës së Naftës në Ballsh, në pyllin e fshatit Kalenjë.
Pas një sërë hetimesh, policia ka arrestuar autorin e ngjarjes, i cili është identifikuar si shtetasi F.Y, 41 vjeç, banues në fshatin Aranitas, Mallakastër.
Ajo që ka “tradhtuar” autorin e vrasjes është celulari i viktimës, i cili i është gjetur dhe sekuestruar nga policia.
NJOFTIMI I POLICISË:
Fier
Policia zbardh një vrasje të ndodhur në Nëntor të vitit 2016.
Kapet dhe ndalohet autori i dyshuar.
Sektori për Hetimin e Krimeve të Rënda në D.V.P Fier dokumenton ngjarjen e ndodhur në fshatin Kalenjë, Mallakastër ku në datën 29.11.2016 në pyllin e këtij fshati u gjend nga një bari kufoma e shtetasit Sh.D.
Shtetasi Sh.D, 57 vjeç, ishte shpallur në kërkim për largim nga banesa që më datë 14.11.2016.
Pas një punë operative dhe hetimore intensive, nga Specialistët për Hetimin e Krimeve të Rënda, me dokumentimin e kësaj ngjarje, u bë i mundur finalizimi me sukses i operacionit të koduar “Shkunjëza”.
Si rezultat i këtij operacioni, në bashkëpunim dhe me Prokurorinë e Rrethit Gjyqësor Fier u bë i mundur ndalimi i shtetasit:
F.Y, 41 vjeç, banues në fshatin Aranitas, Mallakastër.
Prokuroria e Rrethit Gjyqësor Fier në datën 09.10.2017 ka nxjerrë urdhër ndalimi ndaj këtij shtetasi për veprën penale “Vrasje me dashje” pasi shtetasi F.Y është autor i dyshuar i vrasjes së shtetasit Sh.D.
Në cilësinë e provës materiale, autorit të dyshuar i është gjetur celulari i viktimës.
Vijon puna për gjetjen e provave të tjera materiale dhe dokumentimin e plotë ligjor të kësaj ngjarje.
