“E godita me thikë sepse më ofendoi, nuk duroja dot më”, kështu është shprehur përpara togave të zeza Gazmend Musta, personi që vrau gruan dhe kunatën me thikë.
Krimi monstruoz ndodhi në 2 janar në Ballsh, në prani të dy fëmijëve të mitur për motive banale.
Viktima mbeten dy motrat Gentiana dhe Merisa Çaushi. Në ambientet e gjykatës, Musta deklaroi se vrau gruan pasi ajo kishte kërkuar që të shkonte tek prindërit. “E vrava gruan ngaqë kërkoi të shkonte te prindërit. Nuk isha dakord që gruaja të shkonte te prindërit. Gruan e godita me thikë sepse më ofendoi, s’duroja më”.
Gentiana ka kërkuar të shkojë në shtëpinë e prindërve për vizitë, por i shoqi nuk e ka lejuar. Pas debateve, ajo ka thënë se do merrte fëmijët dhe do të shkonte vetë në fshat. Gjë që ka zemëruar të shoqin, i cili ka thënë se është ai burri i shtëpisë dhe vendoste ai se çfarë do bëhej.
Pas sherrit, Musta ka marrë thikën dhe ka qëlluar gruan e tij, ndërsa më pas ka qëlluar edhe kunatën që ndodhej aty dhe që ndërhyri për të shpëtuar motrën.
34-vjeçari ishte emigrant në Greqi dhe ishte kthyer për festat e fundvitit.
