Gjykata e Vlorës ka caktuar masën e sigurisë “arrest me burg”, për Hysnie Hoxhallarin dhe Kasëm Pirjasin, të cilët në bashkëpunim vranë e më pas dogjën Selkie dhe Olsi Hoxhallarin.
Këta të fundit janë përkatësisht vjehrra dhe bashkëshorti i Hysnies, ndërsa kjo e fundit u zbulua se kishte një lidhje jashtëmartesore me Pirjasin.
Fillimisht u dyshua se ngjarja ishte aksidentale, por më pas u zbulua se ajo ishte kryer nga vetë nusja e Olsi Hoxhallarit, në bashkëpunim me të dashurin e saj nga Fieri.
Pas caktimit të masës së sigurisë, gjykata vendosi që këtë çështje t’ja kalojë për gjykim Krimeve të Rënda.
Ngjarja ndodhi më 21 janar rreth orës 4:20, në qytetin e Vlorës janë djegur dhe kanë ndërruar jetë nënë e bir, Selkie dhe Olsi Hoxhallari, 73 dhe 43 vjeç. E moshuara kishte një shenjë prerje në fyt, kurse djali i saj një të çarë në kokë. Policia që në fillim deklaroi se dyshonte se dhe zjarri është vënë për të mbuluar gjurmët. Një ditë pas krimit, Hysnia kërkoi drejtësi para medias, që të zbardhje e vërteta, por më pas rezultoi se ajo ishte bashkëpunëtore e krimit të dyfishtë.
Gruaja ka shtuar se pasi Kasemi i kishte vrarë të dy, edhe bashkëshortin dhe vjehrrën ,ai e kishte njoftuar për masakrën, e ndërsa ajo ka fshehur vetëm sëpatën.
“E lava hanxharin”, ka rrëfyer gruaja e cila ka treguar edhe vendin ku ishte fshehur, “ai i vendosi zjarrin banesës së vogël dhe kur ai iku, unë prita deri në orën katër të mëngjesit dhe pastaj njoftova policinë” ka thënë ajo. Para gjykatës, Hysnia ka shprehur pendesë për ngjarjen e rëndë.
Kasemi para trupit gjykues ka thënë se ka vrarë nënë e bir pasi nuk takonte dot Hysnijen me të cilën kishte një lidhje, pas kthimit të Olsit nga Greqia.
Avokati i të pandehurës, Sokol Zotaj ka thënë se Hysnia nuk bashkëpunoi në krim, por duhet të dënohet për moskallëzim krimi, dhe jo për vrasje.
