Pas ngjarjes që tronditi vendin, se vëllai dhe bashkëshorti i vranë të dashurin 20-vjeçares, vjen edhe rrëfimi i kësaj të fundit. Në rajonin e policisë, ku dhe ka dhënë dëshminë, e reja e ka mohuar të ketë patur një raport me viktimën, por ka patur vetëm ngacmime. Arben Gjeci, 34-vjeçari nga fshati Bastar i Mesëm u vra nga Esat Cani, pasi ky i fundit dyshonte se viktima kishte lidhje intime me motrën tij të martuar. Dyshimet i ka pasur fillimisht bashkëshorti i 20-vjeçares, Dëfrim Kurti, i cili i është ankuar kunatit se motra e tij e tradhëtonte. Sipas së resë, Arben Gjeci e kishte ngacmuar disa herë në fshat, por kjo nuk i kishte dhënë afrimitet.
Dinamika e ngjarjes
Arben Gjeci, 34-vjeç, baba i tre fëmijëve, shofer i furgonit të linjës së Tiranës, u godit me sende të forta në kokë dhe ndërroi jetë në spitalin e Traumës. Esat Cani akuzohet se e kreu vrasjen pasi zbuloi lidhjen e motrës së tij të martuar, 20 vjeçe, Elida Cani me viktimën. Në vrasje bashkëpunoi dhe burri i 20-vjeçares, Dëfrim Kurti.
Ishte fillimisht bashkëshorti i 20 vjeçares i cili iu ankua kunatit se motra e tij e tradhëtonte. Për ta vërtetuar, ata ndoqën 20 vjeçaren dhe e kapën tek një kasolle pranë shtëpisë me Arben Gjecin, dhe aty e kanë goditur në kokë 34 vjeçarin. Më pas trupin e hodhën në një zonë tjetër.
Kanë qenë banorët ata të cilët njoftuan policinë, pasi vunë re trupin e Gjecit. Fillimisht ngjarja u konsiderua aksidentale nga policia, ndërsa më pas u vërtetua se ishte vrasje.
Lidhur me rastin policia ka arrestuar autorin Esat Cani, motrën e tij 20 vjeçare dhe bashkëshortin e kësaj të fundit.
