Nuk ka asnjë lajm për njohjen mes tyre, të tre viktimave nga atentate të mirëstudiuara,- Everest Çakës në Elbasan dhe Bledar Birçajt e Delion Troqes në Vlorë. Madje, nuk ka asnjë hetim që të lidhë me njëra-tjetrën ngjarjet.
Por gjithsesi ata kanë tashmë një të përbashkët, janë ekzekutuar pak kohë pasi kanë mbërritur në Shqipëri nga Spanja. Ndaj, për të tre rastet, një nga pistat e hetimit është përfshirja e mundshme në aktivitete kriminale në këtë vend, arsye që dyshohet se mund të ketë sjellë larjen e hesapeve në Shqipëri.
Vrasja e Birçajt
I pari që humbi jetën në Vlorë, më 10 maj ishte Bledar Birçaj. Ngjarja ndodhi në lagjen “Hajro Çakërri”, ku 40-vjeçari Bledar Birçaj po lëvizte me makinën tip BMW dhe i dolën në pritë.
Pasi u qëllua me breshëri kallashnikovi, Bledar Birçaj u dërgua me urgjencë në spital, por nuk ia doli t’i mbijetonte plagëve të rënda, dhe ndërroi jetë. 40-vjeçari ishte pronar i një bar-kafe në qytetin e Vlorës. Ai kishte vetëm pak kohë që ishte kthyer nga Spanja. Emri i tij nuk ishte një emër i panjohur për policinë, pasi në vitin 2011 është arrestuar në Vlorë si i dyshuar për vrasje, duke iu vendosur masa e “arrestit me burg”, me afat 45 ditë. Gjithashtu, edhe në vitin 2010, Birçaj së bashku me vëllanë e tij dhunuan juristin e Zyrës Vendore të Regjistrimit të Pasurive të Paluajtshme, personin me inicialet F. H. Për këtë në atë kohë, Prokuroria nisi procedim penal në gjendje të lirë për dy të rinjtë.
Vrasja e Çakës
Në 11 maj, pra një ditë pas vrasjes së Birçajt në Vlorë, në Elbasan u ekzekutua Everest Çaka në sy të gruas. Çifti kishte vetëm pak kohë që ishte kthyer nga Spanja. Hetuesit thanë se janë 3 pista hetimi për këtë ngjarje, nisur edhe nga e kaluara e viktimës. Përplasja mes grupeve kriminale, hakmarrja dhe prishja e pazareve të drogës, janë pistat ku janë përqendruar për momentin hetimet.
14 vite më parë, vëllai i viktimës, Alfons Çaka, i njohur si “Nocja”, do ekzekutohej në Barcelonë të Spanjës, por pas 4 vitesh, në vitin 2011, tek ura e Zaranikës u ekzekutua Gëzim Alikajt. Për këtë ngjarje, u akuzua 41-vjeçari Everest Çaka, por akuzat nuk u provuan kurrë. Ndërkohë rreth 4 muaj më parë, po në Spanje do vritej edhe Florenc Alikaj (vëllai i Gëzim Alikajt), vetëm pak muaj pasi kishte dalë nga burgu.
Gjithashtu Çaka u dyshua edhe për masakrën e familjes Muhameti, të cilët në nëntor të vitit 2011 u ekzekutuan me nga një plumb në kokë: Emin Xhelal dhe Pëllumb Muhameti, vëllezërit dhe babai i “Nel Camit”, edhe ky kundërshtar i familjes Caka. Por nuk përjashtohet as përplasja mes grupeve, pasi Çaka është djali i tezes së Arjan Spahiut, i cili u ekzekutua në Belgjikë. Ky i fundit është vëllai i kunatit të Indrit dhe Erion Alibej. I pari i ekzekutuar në atentatin e dyfishtë, ndërsa i dyti i arrestuar si porositës i disa atentateve që kanë tronditur Elbasanin.
Vrasja e Troqes
Pa u shuar jehona e vrasjes së Birçajt dhe Çakës, mbrëmjen e së premtes u ekzekutua edhe Delion Troqe me 10 plumba në trup, duke mbetur i vdekur në vend. 38-vjeçari është qëlluar para pallatit të Sportit në Vlorë, ndërkohë që policia njoftoi pak më vonë se një makinë ishte gjetur e djegur në zonën e “Sherishtës” në Vlorë. Edhe ai, vetëm pak kohë që ishte kthyer po nga Spanja.
Më parë, Troqe ka qenë i dënuar për drogë, ndërsa gjatë verës kur kthehej nga Spanja punonte me skaf me turistët në rivierën e jugut. Në vitin 2018, Troqes iu rrëmbye një kushëri në mes të Vlorës, Ervis Troqe, një ngjarje që edhe sot ka mbetur e pazbardhur e që askush nuk di asgjë për të. /TIRANA TODAY
