Ministri i Brendshëm, Fatmi Xhafaj ka folur për pikat më të nxehta të policisë së shtetit, korrupsionin, vrasjet, reformat në polici dhe procesin e vetingut në strukturat policore.
Për ministrin, vlerësimi i policisë nga opinioni publik është pozitiv, ndërsa shton se Shqipëria është një vend i sigurt për jetën, punën dhe për qasjen e të bërit biznes, por natyrisht këto shoqërohen edhe me probleme të vogla. Teksa ka folur në Vizion Plus, Xhafaj tha se institucioni i policisë, është më i besuar se ai i Gjykatave dhe Prokurorisë dhe kjo konfirmohet nga sondazhet e kryera.
“Në vlerësim tim dhe jo vetëm, në vlerësimin e opinionit publik, edhe në atë të organizmave ndërkombëtare që merren me këtë çështje, Shqipëria është një vend i sigurt. E sigurt në kuptimin e jetës, punës, e të bërit biznes. Natyrisht nuk është vend pa probleme. Por raporte të tilla lidhur me indeksin e krimit janë vlerësuese, megjithatë nuk janë të vetmet. Në të gjitha sondazhet, Policia e Shtetit në perceptimin qytetar konsiderohet një ndër agjencitë më të besueshme (më shumë se Gjykatat e Prokuroritë). Dhe këto nuk janë vlerësime të MB, por të Bashkimit Europian.”-shprehet ministri.
Vrasjet dhe krimi në qytetet e ndryshme të Shqipërisë dhe kryesisht në Elbasan kanë qenë shqetësuese, por për Xhafajn, viti i kaluar është një sukses i policisë. Ai tha se shifrat e aksidenteve, vrasjeve dhe grabitjeve janë të ftohta, por shton se këtë mund ta kisha cilësuar si sukses në fillim të janarit, por nuk ka zgjedhur ta bëjë, pasi çdo vrasje është shqetësuese për ministrin
“Flitet për vrasjet. Por sipas statistikave 2017 ka treguesit më të mirë të kriminalitetit të viteve të fundit. Në 27 vite është numri më i ulët i vrasjeve, i vjedhjeve me dhunë, apo numri i aksidenteve me pasojë vdekjen. Shifrat janë të ftohta. Mund të kisha dalë në fillim të Janarit e të thoja “Sukses!”. Po dhe një vrasje e shoh si problem për mua”-shprehet ai.
