Kryetari i opozitës Lulzim Basha ka reaguar në mesnatën e së shtunës për vrasjen e ish-oficerit Artan Cuku, duke theksuar se shteti e kishte hedhur në rrugë prej kohësh, pavarësisht rezultateve të tij në luftën ndaj krimit.
“Vrasja e oficerit Artan Cuku poshtë banesës së tij është një lajm tronditës. Artan Cuku ishte një oficer karriere me rezultate të larta në luftë ndaj krimit në gjithë detyrat e tij të larta. Një prind i shkëlqyer, një koleg i veçantë. Më pikëllim të madh ndaj këtë moment dhe dua t’i shpreh familjes së tij ngushëllimet më të sinqerta. Po gjithashtu, dua të shpreh dhe revoltën për largimin e tij të padrejtë nga policia, duke e hedhur kështu në rrugë, pa motiv ligjor, një oficer që ka luftuar krimin për 15 vite. I bëj thirrje prokurorisë të zbardhë sa më shpejt ngjarjen e të vendosë autorët para ligjit”, shprehet Basha përmes njoftimit për shtyp të Partisë Demokratike.
