Gjykata e Apelit ka lënë në fuqi vendimin me burgim të përjetshëm për Përparim Ademin, autori i vrasjes së dy motrave në Tiranë.
Autori kishte apeluar vendimin me pretendimin se vuan nga probleme mendore, por kjo kërkesë është rrëzuar, kështu gjykata ka lënë në fuqi burg për jetë për autorin.
Kujtojmë që ngjarja e rëndë u shënua më 31 dhjetor të 2020, teksa dy motrat Zhaneta Metani dhe Kristina Bardhi ndodheshin në shtëpinë e tyre.
Autori Përparim Ademi kishte lidhje intime me të dyja motrat dhe shkak i vrasjes dyshohet se është bërë kërkesa e motrave për tu ndarë nga Ademi.
Përparim Ademi shkoi i armatosur me kallashnikov, të cilin e kishte fshehur në një çantë. Në hyrje të pallatit, ai ka lënë biçikletën e tij. Kur ka mbërritur përpara derës së banesës ku jetonin Zhaneta Metani dhe Kristina Bardhi, Përparim Ademi është përballur me dy motrat.
Në këtë moment, pa u futur ende brenda apartamentit, 59-vjeçari ka shkrepur armën. Pasi ka hyrë në brendësi, Përparim Ademi qëlloi me breshëri kallashnikovi dy motrat. Zhaneta Metani dhe Kristina Bardhi mbetën të vdekura në vend.
