Një tjetër protestë është paralajmëruar për t’u mbajtur në datën 18 dhjetor, për vrasjen e 14-vjeçarit Martin Cani dhe ngjarjet e ndodhura ditët e fundit, ku një adoleshent në Fier mbeti i plagosur dhe një armë zjarri iu gjet një të mituri në Vlorë.
‘Qëndresa Qytetare’ përmes një njoftimi bën të ditur se protesta do të mbahet në kryeqytet, ku do të kërkohet rritje e sigurisë në shkolla dhe dorëheqja e ministers së Arsimit.
Kujtojmë se për ngjarjen e rëndë të ndodhur në shkollën Fan Noli në Tiranë, ku mbeti i vrarë 14-vjeçari Martin Cani, janë zhvilluar edhe disa protesta të tjera.
Njoftimi i Qëndresës Qytetare:
Siguria, MAS betejë online, shkollat offline!
Një nxënës i plagosur me thike në ambientet e brendshme të gjimnazit të Cakranit në Fier dhe një nxënës 14 vjeçar i kapur më armë zjarri në qytetin e Vlorës, janë pasqyra e qartë e dështimit të propagandës së MAS për sigurinë në shkolla.
Kjo ngjare ndodh kur shkollat dhe policia janë në alert për shkak të tragjedisë në shkollën “Fan Noli” ku mbeti i vrarë Martin Cani dhe u plagos Luis Meçe.
Nëse MAS do kishte kërkuar nga shkollat të angazhoheshin për sigurinë, aq sa angazhohen për të bërë share postimet e ministres Manastirliu dhe MAS në rrjetet sociale, realiteti në shkollat tona në raport me sigurinë do të ishte krejt tjetër.
Për ironi të fatit Fieri ishte ndalesa e parë e turit të Ramës dhe Manastirliut për të folur për rrezikun që u kanoset nxënësve nga rrjetet sociale, kur në fakt shkollat janë të ekspozuara përballë institucioneve të korruptuara që duhet ti monitorojnë.
Teksa propaganda për sigurinë në shkolla po korr sukses online, siguria në shkolla në mbarë vendin në fakt është offline.
Në 18 dhjetor të gjithë duhet të dalim në shesh në protestën e organizuar nga komuniteti i prindërve dhe të kërkojmë që siguria në shkolla të mos jetë prioritet vetëm në rrjete sociale por dhe në realitet.
