Kreu i PD-së, Lulzim Basha ka votuar para pak minutash tek çerdhja 13, Njësia 8. Pas votimit, Basha uroi festën e Fiter Bajramit, si dhe bëri një apel që të gjithë shqiptarët, me të drejtë vote, veçanërisht ata të zhgënjyerit nga politika që të mos mungojnë në zgjedhje, por të votojnë për të ndryshuar jetën e tyre.
FJALA E BASHËS PAS VOTIMIT:
Dua ta nis urimin për festën e Bajramit, ju uroj nga zemra gëzuar Fiter Bajramin të gjithë besimtarëve. Sot është dita ku merret vendimi nga qytetarët për qytetarët.
Mos mungoni, ejani dhe hidheni votën tuaj. Vetëm përmes votës mund të ndryshohet e ardhmja, në veçanti këtë thirrje e kam për të zhgënjyerit nga politika, ejani të gjithë, merrni pjesë në këto votime. Vetëm përmes votës suaj mund të ndryshojë Shqipëria, mund të ndryshojë jeta juaj.
Askush nuk duhet të ndjehet i përjashtuar. Le ta bëjmë këtë ditë një festë të dyfishë: festën e Zotit, festën e demokracisë./ Tirana Today
