Çështja e Teatrit është ende e ndezur. Në këtë valë debatesh, ministrja Kumbaro ka zgjedhur që ti shmanget seancës dëgjimore, e për këtë ka dërguar një letër shfajësimi drejt kryetares së Komisionit të Medias, Albana Vokshi.
Ndoshta dhe e trembur nga çfarë ndodhi ditë më parë, ku Veliajn e nxorën me dhunë nga mbledhja, sot Ministrja e Kulturës, Mirela Kumbaro, ka përcjellë një letër, ku thotë se nuk do të marrë pjesë nesër në Komisionin e Medias, ku ishte planifikuar një seancë dëgjimore për çështjen e Teatrit Kombëtar.
Ministrja pretendon se për shkak të agjendës së ngarkuar, do e kishte të vështirë që të paraqitej. Por kjo nuk ka rënë në vesh të shurdhër, pasi Vokshi ka kërkuar që të mos zvarriten gjërat, dhe se Kumbaro e ka kaluar cakun.
Vokshi e ka konsideruar refuzim të Parlamentit shkresën e Kumbaros, duke theksuar se është e disata herë që ministrja nuk paraqitet kur duhet të japë llogari për projektligjin, për shembjen e Teatrit Kombëtar.
“Ministrja Kumbaro është nismëtare e këtij projekligji, por që ende nuk ka dhënë asnjë llogari për të. Herën e fundit ajo vendosi të shoqërojë Erion Veliajn dhe të braktisë seancën dëgjimore për ligjin e posaçëm antikushtetues për Teatrin”.
