Një 52-vjeçar iu lut gjyqtarit që ta dërgojë në burg pasi jashtë nuk ka asnjë mundësi ekonomike për të mbijetuar.
Luan Komani, i arrestuar tre herë për rilidhje të paligjshme të energjisë, ishte i gatshëm të burgosej pasi nuk mund të paguajë detyrimin prej 200 mijë lekësh.
“Jam me ‘Kemp’”, tha burri me prejardhje nga Përmeti që edhe pse më herët ka punuar si financier, tashmë nga papunësia, varfëria e ka vendosur me shpatulla pas muri.
“Unë dhe familja ime jetojmë me 27 mijë lekët e ‘kempit’ që më jep shteti”, tha Luan Komani.
“As vajzat, që të dyja studente, as gruaja, nuk po gjejnë punë dhe për shkak të borxheve kemi vendosur në shitje shtëpinë”, shkruan Top Channel.
52-vjeçari i tha gjyqtarin Julian Haxhia se për shkak të varfërisë dhe pamundësisë për të paguar borxhin e dritave ka tentuar të vrasë veten, por pas kësaj ngjarjeje i kishte dhënë fjalën policisë se nuk do dorëzohej.
Me kërkesë të prokurorit, Gjykata vendosi masën arrest shtëpiak ndaj 52-vjeçarit, i cili pas vendimit nuk shfaqi asnjë shenjë gëzimi që shpëtoi nga qelia.
