Prokuroria e Vlorës ka sekuestruar rreth 6100 m2 truall, 24 apartamente të një pallati dhe 32 % të një pallati tjetër në qendër të qytetit, të dyshuar se janë pasuri të krijuara në bazë të dokumenteve të falsifikuar.
Sekuestrimi u bë pas kallëzimit të dy shtetasve, ndërsa nga hetimi rezulton se shtetasi Lavdosh I. ka regjistruar, mbi bazën e dokumenteve të falsifikuara, një sipërfaqe trualli prej rreth 10.000 m2.
Origjina e pronës bazohet në dokumentin “Vërtetim pronësie, datë 04/09/1993”, lëshuar nga Përgjegjësi i Seksionit të Kadastrës pranë Këshillit të Rrethit Vlorë. Por, bazuar në aktin e ekspertimit tekniko-grafik, rezulton se ky dokument është i falsifikuar.
Sipërfaqja e pronës së regjistruar është ndarë dhe tjetërsuar me qëllim fshehjen e origjinës së paligjshme, si dhe është spostuar duke përdorur dokumentin e mësipërm. Gjithashtu, pas kryerjes së veprimeve juridike mbi këtë pronë, rezulton se mbi dy pasuri janë ndërtuar dy objekte, e konkretisht një objekt 8-katësh dhe një objekt 11-katësh.
