Policia e Vlorës ka nisur procedimin penal ndaj një firme ndërtimi,si dhe ndaj 4 personave, të cilët akuzohen se kanë shpërdoruar detyrën për rastin e projektit të Lungomares.
Kompania e ndërtimit, e cila ka realizuar projektin e ndërtimit të shëtitores të vijës bregdetare Lungomare Vlorë, ka krijuar disa degëzime dhe hyrje-dalje në disa objekte, duke devijuar projektin, gjë që bie ndesh me kriteret e përcaktuara në Kodin Rrugorë të Republikës së Shqipërisë.
Kështu, Specialistët e Hetimit të Krimit Kundër Korrupsionit në Drejtorinë Vendore të Policisë Vlorë kanë nisur procedim penal ndaj kompanisë së ndërtimit.
Një tjetër rast është konstatuar në fshatin Hoshtimë-Treblovë, Vlorë për shpërdorim detyre, ndërtim i paligjshëm dhe shkatërrim prone prej katër shtetasve të tjerë, konkretisht:
P.Sh., 49 vjeç dhe Z.SH., 46 vjeç, banues në Sevaster, Vlorë, (vëllezër).
V.B., 45 vjeç, banues në Peshkëpi, Vlorë,
F.B., 35 vjeç, banues në Llakatund, Vlorë.
Ndaj shtetasve të mësipërm ka filluar procedimi penal pasi nga të dhënat e marra dhe nga hetimet e kryera rezulton se shtetasit e lartpërmendur në bashkëpunim me njëri-tjetrin, në fshatin Hoshtimë/Treblovë, kanë hapur një karrierë që shfrytëzohet për nxjerrje të rërës bituminoze, për të cilën nuk kanë leje shfrytëzimi, duke nxjerrë sasira të konsiderueshme të kësaj lënde minerale, që sipas legjislacionit mund të shfrytëzohet vetëm pasi të jenë pajisur me leje përkatëse.
Materialet iu kaluan Prokurorisë se Rrethit Gjyqësore Vlorë për të dyja rastet e mësipërme për veprën penale “Shpërdorimit të detyrës”, “Ndërtim i paligjshëm” dhe “Shkatërrim prone”, parashikuar nga nenet 248, 199/a dhe 150 të Kodit Penal.
