E përditësuar/ Detaje të reja janë zbardhur nga ana e policisë, pas atentatit ndodhur mbrëmjen e djeshme në Vlorë. Pas marrjes në pyetje të 20 personave, burimet shtojnë se në vendin e ngjarjes është gjetur një armë tip automatik, e cila dyshohet ti përkiste viktimës.
Arma është gjetur rreth 30 metra larg vendit të krimit, e ndërsa në vrasje dyshohet se kanë marrë pjesë tre persona. Viktima Vasil Dervishaj, pronar i një lokali të njohur në këtë qytet, është qëlluar me një plumb në kokë. I ndjeri është kontigjent i njohur nga policia, dhe në procedim për lëndë narkotike.
29-vjeçari ka qenë duke udhëtuar në një makinë tip Ford me targa italiane, kur është qëlluar.
Njoftimi i policisë:
“Më datë 04.06.2018, në lagjen “Pavarësia”, tek ish-kombinati i peshkut, është vrarë me armë zjarri shtetasi V.D., 29-vjeç, banues në Vlorë.
Janë ngritur pika kontrolli, dhe po krihet zona me qëllim kapjen e autorit.
Grupi hetimor ka nisur punën për zbardhjen e rrethanave të ngjarjes, dhe për identifikimin e kapjen e autorit”.
Vlorë/ E qëllojnë me 8 plumba, policia merr në pyetje 20 persona për 29-vjeçarin
Pas ngjarjes së rëndë që tronditi Vlorën, uniformat blu menjëherë janë vënë në lëvizje për hedhjen dritë të krimit dhe kapjen e autorëve. Burimet paraprake, ende jo zyrtare, thonë se tashmë janë marrë në pyetje 20 persona, dëshmitarë, apo persona që mund të ndihmojnë në zbardhjen e atentatit ndaj Vasil Dervishajt, 29 vjeçarit i cili ka marrë 8 plumba, njëri prej tyre, dhe ai vdekjeprurësi ka qenë në kokë.
Policia e ka edhe më të vështirë zbardhjen e ngjarjes, ndërsa kamerat e sigurisë nuk kanë funksionuar. Në atë zonë, një rrugicë mes pallateve nuk kanë funksionuar kamerat e sigurisë, të cilat mund të ndihmonin sadopak në gjurmët e autorëve.
Pistat e hetimit
Policia zyrtarisht nuk ka dhënë asnjë pistë hetimi lidhur me vrasjen, dhe është treguar e rezervuar në dhënien e detajeve. Por, një nga pistat e hetimit është dhe trafiku i drogës, për të cilën biznesmeni ishte arrestuar disa vite më parë, por duket se kjo çështje kishte mbetur në kuadër të procedimit policor, pasi 29-vjeçari nuk rezulton i dënuar nga gjykata.
