710 kilogramë lëndë narkotike, e dyshuar e llojit Cannabis Sattiva është sekuestruar në orët e para të mëngjesit të sotëm në Vlorë.
Në bazë të informacioneve të marra në rrugë operative, Drejtoria Vendore e Policisë Vlorë, në bashkëpunim me Drejtorinë Vendore të Policisë Kufitare dhe Migracionit Vlorë kanë finalizuar me sukses operacionin e koduar “Weekends”. Kështu, policia ka sinjalizuar gjatë natës një automjet, i cili dyshohej se transportonte lëndë narkotike.
Menjëherë ka filluar ndjekja dhe është bllokuar mjeti tip furgon me targë EL 2494 C, në orët e para të mëngjesit të sotëm në banesën e shtetasit Selman Hamitaj, në fshatin Dukat në Vlorë.
Pas kontrollit, brenda mjetit është konstatuar një sasi me lëndë narkotike, e cila pas peshimit të përgjithshëm ka rezultuar 710 kilogramë. Lënda narkotike ishte e ndarë dhe e vendosur në 27 pako të mbështjella me plastikë dhe natriban, si dhe në 8 çanta sportive, të cilat u bllokuan dhe u sekuestruan në cilësinë e provës materiale.
Në lidhje me këtë ngjarje, Policia ka arrestuar në flagrancë shtetasin Selman Hamitaj, 71 vjeç, banues në fshatin Dukat, Vlorë, dhe ka shpallur në kërkim shtetasin B.T., 44 vjeç, banues në Durrës, si autorë të dyshuar në lidhje me këtë ngjarje.
Vazhdojnë hetimet për zbulimin dhe kapjen e autorëve të tjerë bashkëpunëtorë të implikuar në këtë veprimtari kriminale.
