Prej disa ditësh, qytetarët e Vlorës dhe turistët po përballen me mungesën e furnizimit me ujë të pijshëm. Situata është më problematike në lagjet Kushtrimi, Pavarësia dhe Stacioni i Trenit, ku banorët shprehen të revoltuar, duke theksuar se edhe kur uji vjen, ai është i papastër dhe me presion shumë të ulët.
“Po ku ka ujë të pijshëm? Ai ujë që vjen në çezma jo vetëm që nuk pihet, por është me pakicë,” u shprehën disa prej tyre. Të tjerë theksojnë se uji vjen për vetëm gjysmë ore në mëngjes dhe në mbrëmje, duke mos i lejuar as të mbushin enët.
Banorët e cilësojnë këtë situatë të patolerueshme në këto temperatura të larta. “Është turp i madh të mos kesh ujë në këtë të nxehtë,” shprehen ata.
Prefekti i Vlorës, Plator Nesturi, deklaroi se është në kontakt me bashkinë dhe Drejtorinë Rajonale të Ujësjellësit për të gjetur një zgjidhje.
Ujësjellësi kishte njoftuar që më 9 qershor për ndërprerje të furnizimit me ujë, si pasojë e stakimeve të energjisë elektrike në zonat ku ndodhen stacionet e pompimit, si dhe për shkak të një avarie në një nga stacionet kryesore. Megjithatë, edhe pas 10 ditësh, problemet në qytet vijojnë pa zgjidhje.
