Vllaznia i shpëtoi në ndeshje të fundit rënies nga kategoria sezonin që lamë pas dhe si duket më keq e nisi të riun. Problem për shkodranët nuk kanë qenë vetëm rezultatet e dobëta, por edhe menaxhimi i lojtarëve dhe përpilimi i kontratave. Pasi në ditët e sotme po bëhet rast i përsëritur që lojtarët të hedhin në gjyq ekipi dhe të përfitojnë shuma të mëdha parash.
E një gjë e tillë duket se po ndodh edhe me Çarls Atsinën. Sulmuesi ganez u afrua tek Vllaznia me 16 gusht të vitit 2017. Ai firmosi në momentet e fundit të merkatos së verës, pasi qëndroi për disa ditë në provë. Shpresat në repartin e sulmit ishin tek ky lojtar, i cili në fakt nuk bëri asgjë me shkodranët. Përveç dy golave në Kukës, në ndeshjet e tjera me Vllazninë, Atsina qëndronte në hije ose në stol.
Tashmë ai është rikthyer sërish në protagonist tek Vllaznia, por jo në fushën e lojës. Të enjten shkodranët zyrtarizuan prishjen e kontratën me Atsinën, si shkak i ardhjes me vonesë të lojtarit në stërvitje dhe mos-pranimit të aktivizimit me ekipin e Vllaznisë B. Kontrata e Atsinës nuk ka qenë një vjeçare si ç’është folur, por 2 vjeçare dhe me një pagë 2 milionë e 900 mijë lekë të vjetra në muaj deri me 31 maj të vitit 2019.
E sigurt se çështja është në FIFA dhe me shumë mundësi Atsina do të fitojë ndaj Vllaznisë. Kuqeblutë i prishën kontratën në mënyrë të njëanshme, pasi refuzoi të luante me ekipin e dytë. Nga ana tjetër, lojtari bashkë me menaxherin e tij pretendojnë se në kontratë shkruhet se sulmuesi duhet të luajë me ekipin e parë. Tashmë mbetet të presim se çfarë do të vendosë FIFA…
