Vllaznia pas 99 vitesh histori suksesi në futbollin shqiptarë, është në buzë të greminës pasi mund të quhet si e rënë në Kategorinë e Parë. Një situatë shumë dëshpëruese për të gjithë sportdashësit shkodranë. Për këtë fakt ka reaguar edhe ish-mbrojtësi i Vllaznisë, Suad Lici, i cili nuk është kursyer aspak me drejtuesit, stafin dhe lojtarët.
”Ça me t’than, ça me t’than unë i shkreti? Jemi të shokuar, jemi pa fjalë. Është një trup i madh për Shkodrën dhe jo vetëm. Është një dëm kolosal që këta sportistë i kanë bërë Vllaznisë në radhë të parë dhe vetes së tyre, sepse kjo është një goditje e madhe për karrierën e tyre. Nuk di çfarë të them. Paçin faqen e zezë, sepse e koritën Shkodrën dhe Vllazninë. Nuk duhen mbyllur sytë vetëm për lekun. Sinjalet u dhanë që sezonin që shkoi, kur shpëtuam në ndeshjen e fundit. Duhej reflektuar, por nuk u reflektua, ndaj dhe Vllaznia vazhdon të vuajë e tani të gjendet në këtë situatë, duke rënë në Kategorinë e Parë. Problemi kryesor, për mua, qëndron te njerëzit që punojnë dhe që janë aktualisht te Vllaznia, që nga stafi administrativ, stafi teknik dhe futbollistët,” shprehet Lici për Vipsport.
Duke u ndalur tek lojtarët, ai shton: “Nuk e ndjejnë aspak fanellën. Ata nuk e dinë çfarë fanelle mbajnë veshur. Ata nuk e dinë si mund të ndihen tani Sabah Bizi, Hysen Zmijani, Bardhyl Jera, Vioresin Sinani e shumë të tjerë që nuk po ua them emrin. Është e tmerrshme, por këta sportistë nuk kanë edukatën e punës, janë persona që janë mësuar të paguhen pa punuar, pa e bërë si duhet punën e tyre.”
Ndërsa, për dorëheqjen e trajnerit Gjoka thekson: ”Një gabim shumë i madh, sepse nuk lihet skuadra në këtë moment, dy javë para fundit të kampionatit. Kemi rastin e Mirel Josës sezonin që shkoi me Tiranën, kur ai qëndroi deri në momentin e fundit. Nuk braktiset ekipi. Siç ata lojtarë kanë marrë një kosto, edhe ti duhet ta marrësh këtë kosto. Nuk e di çfarë të them, por te Vllaznia vijnë njerëz që paguhen për një punë, që nuk e dinë, nëse e bëjnë apo jo.”
