Ambasadorja e BE-së në Tiranë Romana Vlahutin, ende nuk ka një vlerësim të sajin për procesin zgjedhor të 25 qershorit në Shqipëri por, në pritje të raportit përfundimtar të OSBE/ODIHR-it, ajo preferon t’i referohet versionit të Përfaqësueses sw lartë, Zv/Presidentes Federica Mogherini dhe Komisonerit Johannes Hahn.
Duke folur për prioritetet që duhet të ketë qeveria e re, Vlahutin është e mendimit se në plan të parë duhet të jetë reforma e drejtësisë. Madje sipas saj, shpresa e shqiptarëve për një sistem të ri drejtësie, ka ndikuar edhe në votën e 25 qershorit, duke i siguruar mazhorancë absolute Edi Ramës. “Reforma e drejtësisë është një bllok themelor, jashtëzakonisht i rëndësishëm për trajtimin e dy përparësive të tjera kyçe që lidhen me shtetin ligjor – luftën kundër krimit të organizuar dhe luftën kundër korrupsionit. Gjatë gjithë kësaj kohe qytetarët e Shqipërisë kanë shprehur një mbështetje shumë të madhe për reformën dhe personalisht, besoj se kjo ka luajtur një rol shumë të rëndësishëm në këtë vote”, tha pwr DW ajo.
Diplomatja e BE-së bëri të ditur gjithashtu se bë kuadër të zbatimit të reformës në Drejtësi, “janë caktuar komisionet e rivlerësimit, vëzhguesit ndërkombëtarë, janë përzgjedhur, ndërtesa, (ku do të kenë selinë institucionet e Vettingut) po mobilohet dhe po hartohet rregullorja – shkurt, rivlerësimi i gjykatësve dhe prokurorëve do të nisë shumë shpejt.”
Vlahutin foli edhe për përgjegjësinë e madhe që i bie qeverisë së re si mazhorancë absolute si dhe për ndikimin e këtyre zgjedhjeve në përafrimin e Shqipërisë me BE-në.
Ndryshe nga eurodeputeti Fackenstein i cili deklaroi se “tashmë duhen hapur negociatat për anëtarësim”, Vlahutin mendon se “rekomandimi për hapjen e negociatave është në varësi të progresit të besueshëm dhe të prekshëm në zbatimin e reformës së drejtësisë, në veçanti rivlerësimin e gjyqtarëve si dhe në pesë përparësitë kyçe: lufta kundër korrupsionit, krimit të organizuar, forcimi i gjyqësorit, administratës publike dhe mbrojtja e të drejtave të njeriut, përfshirë romët dhe politikat antidiskriminuese, si dhe zbatimin e të drejtave të pronësisë”.
