Pas publikimit të raportit mbi përfshirjen e shqiptarëve në rrjete të ndryshme kriminale në Holandë që mund të ketë si pasojë edhe rikthimin e vizave me Shqipërinë, ka reaguar edhe ambasadorja e Holandës në Tiranë.
Ambasadorja Dewi van de Weerd thekson se raporti i zbuluar pjesërisht në mediat holandeze ekziston dhe po studiohet nga Ministria e Drejtësisë dhe Sigurisë, por ende nuk është paraqitur zyrtarisht.
“Ne jemi të vetëdijshëm për artikujt e shtypit holandez në lidhje me një raport konfidencial të policisë holandeze në lidhje me shkallën e krimit të organizuar nga persona me origjinë shqiptare në Holandë. Raporti aktualisht është duke u studiuar nga Ministria Holandeze e Sigurisë dhe Drejtësisë, por ende nuk është paraqitur zyrtarisht në ministri.”- thekson ambasadorja holandeze për Report tv.
Pavarësisht shqetësimit të ngritur nga Holanda dhe propozimit të saj për rivendosjen e vizave me Shqipërinë, do të duhet një vendim i Parlamentit Evropian për të arritur në një situatë të tillë.
Megjithatë, pritet në ditët në vijim që qeveria holandeze të sqarojë në rrugë zyrtare reagimin e saj ndaj kësaj çështjeje.
