Kryetari i Lëvizjes Vetëvendosje, Visar Ymeri ka siguruar se do vazhdojnë kundërshtimin e marrëveshjes së demarkacionit me Malin e Zi në të gjitha mënyrat e protestës.
“Qeveria po e kërcënon Kosovën me Demarkacion ndërkohë që Kuvendi do të duhej të shkarkonte këtë Qeveri dhe me këtë rast ta shpëtojë edhe territorin e Kosovës. Në një skenar të tillë ne do të protestojmë kundër ratifikimit të marrëveshjes dhe do t’i ndërmarrim të gjitha format protestuese”, ka thënë Ymeri duke mos përjashtuar mundësinë e përdorimit të gazit lotsjellës në pengimin e ratifikimit të marrëveshjes.
“Për format e protestës do të ju njoftojmë me kohë por të mërkurën në orën 10:00 të votohet mocioni i mosbesimit dhe kështu ta pamundësojmë që koalicioni qeverisës ta dëmtojë Kosovën me këtë marrëveshje”, ka thënë Ymeri për Zëri.
