Vijon procesi i marrjes në pyetje për ish-presidentin francez, Nicolas Sarkozy, ndaj të cilit rëndojnë pretendimet se ka përdorur fonde të paligjshme për të financuar fushatën e tij elektorale të vitit 2007. Ndërkaq, nuk ka ende një reagim zyrtar nga vetë Sarkozy ose avokatët e tij lidhur me çështjen.
Nicolas Sarkozy u përball me një ditë të dytë të marrjes në pyetje nga hetuesit, të cilët po shqyrtojnë pretendimet se fushata e tij elektorale e vitit 2007 është financuar nga lideri i atëhershëm i Libisë, Muammar Gaddafi.
Ish-presidenti francez është fotografuar duke u larguar së bashku me avokatin nga shtëpia e tij në Paris dhe më pas është parë duke hyrë në zyrën e hetuesve, teksa procesi i marrjes në pyetje filloi një ditë më parë.
As Sarkozy dhe as avokatët e tij nuk kanë komentuar publikisht lidhur me zhvillimet më të fundit nga ky hetim që ka nisur 5 vite më parë.
Sidoqoftë, në fjalime të mëhershme të tij, Sarkozy i ka cilësuar pretendimet si “grotekse” dhe “manipulim”.
Kujtojmë se hetimi në fjalë nisi në vitin 2013, pasi portali mediatik francez Mediapart publikoi deklaratën e një biznesmeni franko-libanez Ziad Takieddine, se ai kishte transferuar 5 milionë euro nga ish-shefi i inteligjencës së Gaddafit drejt kreut të fushatës së Sarkozy.
