Duke marrë para sysh plakjen e popullsisë shqiptare me ritme të shpejta, dhe rënien e numrit të lindshmërie, qeveria ka bërë të ditur se do të marrë masa.
Kryeministri Edi Rama teksa ka folur për risitë e në pr/buxhetin e vitit të ardhshëm e ka vënë theksin tek bonusi që marrin familjet për lindjen e fëmijëve.
Teksa aktualisht ky bonus është 5 mijë lek, Rama nga ambientet e kryeministrisë deklaroi se kjo shumë do të 8-fishohet për fëmijën e parë, duke e bërë 40 mijë lekë, ndërsa për fëmijën e dytë ky bonus do të jetë 80 mijë lekë, ndërsa për fëmijën e tretë do të jetë 120 mijë lekë.
“Ky bonus do jetë në rang kombëtar dhe do t’i shkojë në kohë reale familjes”, u shpreh Rama, teksa ka theksuar se nuk do të ketë vonesa ashtu siç ka ndodhur në të kaluarën me shpërndarjen e këtij bonusi.
“Që nga 1 Janari i vitit të ardhshëm, çdo fëmijë i parë i një çifti do të marrë 8-fishin e bonusit që aktualisht është 50 mijë lekë të vjetra, pra 400 mijë lekë, fëmija i dytë do të marrë 16-fishin, pra 800 mijë lekë dhe fëmija i tretë do të marrë 24-fishin, pra 120 000 lekë”, tha Kryeministri Edi Rama, i cili foli për projektbuxhetin e vitit 2019, me prioritet tek rritja e pagave dhe ulja e taksave.
“Ndërkohë Ministria e Shëndetësisë po përgatitet që çdo bebe që lind në Shqipëri, të regjistrohet në maternitet, duke shmangur të gjitha procedurat në gjendjet civile. Do të regjistrohet dhe do të marrë çekun e mirëseardhjes menjëherë në vendin që lind”.
