Peshëngritësja shqiptare, Romela Begaj ka dalë sot në një konferencë për mediet, pas rezultatit të testit B, të kërkuar nga vetë ajo, ku rezultoi sërish pozitive.
Por, Begaj ka mohuar të ketë marrë ndonjëherë doping, teksa sot përballë gazetarëve kishte marrë dhe librin e shenjtë të Kur-Anit, mbi të cilin u betua se ajo është e pastër.
Po ashtu, peshëngritësja akuzoi shtetin shqiptar se nuk do t’ia dijë aspak për sportistët, ndërsa e pyetur përse ka ndodhur e gjitha kjo, ajo tha:
“Unë mora medalje, më vjen keq që jemi një botë e tretë dhe kam mundur botën e parë”.
Fjala e plotë e Begajt:
Duart e mia janë të pastra, siç Zoti mi ka krijuar. Betohem se i kam duart të pastra, betohem mbi Kuranin, betohem për motrën e nënën.
I them çdokujt, mos merrni pjesë në një krim, mos më akuzoni pa prova. Edhe ju keni familje, e prindër. Hidhet poshtë djersa e gjaku. Unë jam këtu, e gatshme për çdo gjë. Jam sportiste që kam mundur një botë me pastërti. Edhe në 12 të natës të çohem, unë do t’i mund. Më vjen keq që kam lindur në një vend që shtet nuk ka. Unë punën time e bëra, sakrificën e bëra, ju solla medaljen e Artë.
Unë mora medalje, më vjen keq që jemi një botë e tretë dhe kam mundur botën e parë. Jam e pastër, jam e gatshme, është turp për mua që më është akuzuar kjo lloj substance. Kam 13 vjet sport dhe jam e gatshme të më bëjnë çdo lloj analize.
Jam sportiste, nuk kam frikë, asnjë sportist nuk hidhet si këtu. Kemi derdh gjak për këtë flamur. Nqs do kisha pas mbështetje, duhet të kishin shkuar deri në fund për këtë flamur që kemi derdh gjak të gjithë sportistët.
Po të isha amerikane, do e kisha atë medalje. Romela vazhdon, sportin kurrë nuk do e lë, jeta ime është sport. Unë si Romelë nuk kam mundësi financiare për ta ndjekur këtë çështje më lart.
