Kryeministri Rama e ka thënë prerë sot nga mbledhja e grupit parlamentar te PS-se se Ministri i Brendshëm, nuk duhet të përgjigjet, jo ligjërisht, por as moralisht.
Rama akuzoi opozitën shqiptare se nuk po lë pengesë pa ngritur dhe pabesi pa bërë, për të pamundësuar hapjen e negociatave të BE-së me Shqipërinë.
“Sot na del që edhe hartuesi i Reformës në Drejtësi, Ministri i Brendshëm, paska fshehur një dënim të vëllait të tij në Itali para më shumë se 15 vitesh. Ministri i Brendshëm paska qenë edhe një diversant në Reformën në Drejtësi, ku qenka infiltruar për të mos ekstraduar vëllain e tij në Itali, por shyqyr që Shqipëria ka opozitën. Madje Ministri i Brendshëm nuk qenka vetëm fshehësi i dënimit të vëllait, një dokument që është online prej 6 vitesh. Hataja është ku e ku më e madhe, sepse Ministri i Brendshëm qenka kreu i trafikut të drogës.”
“E gjitha do të ishte një parodi për të qeshur, nëse nuk do të kishte helmuar gjakun e ndershëm të qytetarëve të këtij vendi dhe disa ndërkombëtarëve kundër çeljes së negociatave. Kjo në fakt është një maskaradë e mirëfilltë destabilizuese.”
“Ne nuk kemi njerëz për të lëshuar në dhëmbët e ujqërve. Akuzat nuk vijnë nga organet e drejtësisë, por as nuk mund të neglizhohen dhe as mund të lihen vetëm me sqarimet e radhës. Sepse tanimë në majën e thikës ë tyre qëndron një material që dikush duhet të përgjigjet jo me fjalë por me burg. Ministri i Brendshëm nuk duhet të përgjigjet as ligjërisht dhe as moralisht. Për vëllain e tij nuk ka pasur asnjë kërkesë për ekstradimin e tij në Itali. Në mungesë të kësaj kërkese, Shqipëria nuk ka vepruar dot, se s’ka pasur si të veprojë.
Për ne dhe për mua askush nuk është mbi ligjin, që ka një dënim për të kryer në Itali dhe që sot ka marrë vendimin e tij për të shkuar në burg për ta kryer, por edhe për qeverinë, që nuk mund ta ndalonte dhe ta çonte në Itali duke shkelur ligjin. Ky ka qenë qëndrimi i asaj qeverie (Qeverisë Berisha) dhe ky është edhe qëndrimi i qeverisë sonë”, tha Rama.
“Unë e kam marrë mbrëmë përgjigjen të kryer në një prej laboratorëve më seriozë të botës, mua ajo përgjigje më mjafton për t’ju thënë juve se nuk jemi para asnjë lloj prove kundër ministrit të Brendshëm, por para një mashtrimi me një material jo autentik nëpërmjet të cilit kërkohet destabilizimi i qeverisjes dhe moshapja e negociatave me BE.”
Reagimi i Ramës në mbledhjen e Grupit Parlamentar të PS vjen pak pasi vetë Agron Xhafaj tha në një letër publike se “do t’u drejtohet vetë autoriteteve italiane të drejtësisë për të ekzekutuar një vendim dënimi penal të tyre kundrejt meje, edhe pse nuk ka patur asnjëherë (nuk ka akoma edhe sot) asnjë kërkesë dhe asnjë interes nga organet e drejtësisë italiane për të ekzektuar këtë vendim, edhe pse unë asnjëherë nuk kam qenë në kërkim për ekzekutimin e këtij vendimi, unë po e kryej këtë akt.”
Më tej Rama në deklaratë e tij është shprehur se vëllai i ministri ka shkuar dhe u është dorëzuar vetë autoritete italiane.
“Sot Agron Xhafaj ka shkuar me këmbët e tij në burg. Ndërsa ministri do të vijojë punën pasi nuk ka as dhe më të voglën akuzë që e implikon. Ndërsa nga ana tjketër Prokuroria le të bëjë punën e saj”, tha Rama.
