Pak para mbledhjes së qeverisë, ku si çdo herë merren edhe masat ndëshkimore për punonjësit që shkelin ligjin dhe nuk kryejnë detyrën në raport me qytetarët, kryeministri Edi Rama ka qenë në një takim me disa qytetarë që kanë gjetur zgjidhje pas ankesave ne “Shqiperiaqeduam.al”.
“Dëshmitë e njerëzve të zakonshëm që po përdorin gjithnjë e më shpesh platformën shqiperiaqeduam.al flasin vetë? Zgjidhjet po shtohen, duke ndikuar në forcimin e përditshëm të mesazhit tek drejtuesit e punonjësit e zyrave të shtetit?Kush nuk u përgjigjet në kohë njerëzve të zakonshëm, nuk i ikën dot përgjegjësisë në rast se problemet që u krijojen nga administrata i bëhen me dije qeverisë përmes Platformës së Bashkëqeverisjes shqiperiaqeduam.al”, shkruan Rama në postimin në Facebook në lidhjen Live.
“Besimi tek platforma po rritet. hallet dhe problemet që po zgjidhen, po rriten në numër. Edhe skeptikët që i drejtohen Platformës për hajgare, i kthehen sërish me mesazhe falënderuese. Nuk është e tepër që të falënderoj kordinatorët e bashkëqeverisjes për të cilat fjalët e mira që dëgjoj çdo javë për ta janë të merituara. Sot kemi këtu disa zonja dhe zotërinj të ardhur nga vende të ndryshme të vendit dhe i shpreh respektin për këtë fakt të thjesht”, tha Rama. Ndërkohë, fjalën e mori edhe një qytetare, e cila kishte besuar tek platforma e bashkëqeverisjes, ndërsa tregoi se sot problemi me pronën e saj dhe ‘luftën’ 8-vjeçare me Hipotekën kishte marrë fund.
Redi Kola tha se pas 8 vitesh kishte marrë certifikatën e pronësisë, ndërsa e prekur falënderoi platformën. Po ashtu ajo i kërkoi live kryeministrit një përqafim, në shenjë mirënjohje për problemin që i ishte zgjidhur.
“Kam 8 vite që më është bërë padrejtësi nga Hipoteka. Prona iu hoq burrit tim, dhe iu dha vjehrrës. Ia morën. Ngelëm dyerve të Hipotekës, dhe me vuajtje e halle se ka lindur e madhe, kam dy vajza. Faleminderit shumë për këtë që bëtë. Donin të vinin dhe vajzat, dhe më thanë; mami të lutem bëj një fotografi me Edi Ramën. Dua të të përqafoj. Më keni bërë gruan më të lumtur në botë, njëherë kur kanë lindur fëmijët dhe sot”, tha gruaja e prekur.
