“Babai” i partisë zvicerane SVP, Christoph Blocher, është bërë protagonist lidhur me debatin e zhvilluar ditëve të fundit sa i takon shqiponjës dykrenare. Ndonëse i mbron lojtarët, ata, sipas tij nuk janë zviceranë të vërtetë. Mediat zvicerane shkruajnë se “Vështirë se ekziston ndonjë politikan që ende nuk e ka komentuar gjestin e diskutueshëm të shqiponjës dykrenare në Kupën Botërore, në ndeshjen mes Zvicrës kundër Serbisë. Në episodin e fundit të “Teleblocher”, ish këshilltari federal zviceran ka mbrojtur lojtarët e përfaqësueses zvicerane, duke thënë se serbët nuk silleshin në mënyrë miqësore. Por nga ana tjetër, ai nuk heziton të theksojë se sportistët nuk janë shenjtorë: “Serbët në skenë nuk silleshin në mënyrë miqësore. Ata pothuajse rregullisht i mbanin jashtë gjuhët e tyre”. Dhe: “Sportistët nuk janë shenjtorë”.
Por, Blocher nuk e arsyeton me të vërtetë gjestin. “Zviceranë apo jo, nuk bëhet gjest i tillë”. Ndërkaq, moderatori Matthias Ackeret i parashtron pyetjen i habitur: “Por, ata janë zviceranë?” Me këtë rast, Blocher në stilin tipik të SVP-së pohon: “Nëse natyralizohen, nuk do të thotë se janë zviceranë. Ata u goditën në zemër, sepse janë edhe shqiptarë”.
Historia nuk duhet të ekzagjerohet, thotë Blocher, i cili në një moment edhe vetë e bën shqiponjën, duke ilustruar me gjeste atë që u pa në fushën e futbollit. “Që të dyja palët fryhen në zjarr dhe bënë diçka që nuk duhet ta bëjnë, por kjo ekziston në të gjithë botën. Ata nuk vranë askënd”.
