Nënkryetari i Agimit të Artë, Kristos Papas, është një ndër personat që investohet pafundësisht në fajësimin e Shqipërisë për vrasjen e minoritarit Kostandinos Kacifas në Bularat të Gjirokastrës. Ai ka ngritur zërin në parlament dhe ka organizuar protesta pas ngjarjes, duke marrë flamurin si nxitës i urrejtjes mes grekëve dhe shqiptarëve.
Një grup ekstremistësh grekë të “Agimit të Artë” morën pjesë edhe në varrimin e minoritarit Kacifas, duke hedhur parulla antishqiptare dhe kryer veprime të tjera të ndëshkueshme ligjërisht. Por kush është Kristos Papas? E shkuara e këtij funksionari të lartë të partisë ekstremiste greke është e lidhur me nazizmin dhe adhurim për Hitlerin.
Edhe pse Papas para gjykatës ka mohuar të jetë ithtar i nazizmit dhe i Hitlerit, fotot e videot e publikuara nga mediat greke disa vite më parë tregojnë të kundërtën. Papas shfaqet me veshje ushtarake naziste, me kryqin e thyer në krah.
Në foto të tjera ai paraqitet edhe duke nderuar si nazistët. Fotot janë gjetur në banesën e Kristos Papas gjatë kontrollit të ushtruar nga policia, pas vetëdorëzimit të tij në polici.
Në banesën e Papas, është gjetur dhe një tekst të himnit nazist. Gjatë kontrolleve policia ka gjetur edhe pulla me mbishkrime të Musolinit si dhe disa prodhime me etiketat e Italisë nën drejtimin e Musolinit.
Ndërsa më tronditëse kanë qenë videot që janë publikuar në internet, ku ekstremisti Papas shihet duke mësuar edhe fëmijët e tij të thërrasin shprehjen e famshme në nderim të Hitlerit; “Heil Hitler!”. TIRANA TODAY
