Kjo javë ka qenë pozitive për Kolumbinë, por padyshim që ka pasur lajme të mira edhe për kriminelët shqiptarë. Me anë të një njoftimi, Presidenti i Kolumbisë Juan Manuel Santos Calderon, ka bërë të ditur se ka arritur marrëveshjet me dy vende evropiane në mënyrë që kolumbianët mund të udhëtojnë pa vizë, vetëm me pasaportë, në Moldavi dhe Shqipëri.
Këta dy shtete u bashkohen vendeve që përjashtojnë kolumbianët nga vizat afatshkurtra për të hyrë në territoret e tyre.
Pra Shqipëria ka hapur portat e saj për kolumbianët, në një kohë kur në mediat e vendit dhe në të mbarë botës po qarkullojnë lajme të zeza se bandat shqiptare po marrin drogë nga Kolumbia dhe po e sjellin në Evropë.
Rasti në Maminas
Duket e pabesueshme që 25 vjeçarët Donaldo Lushaj, Armando Pezaku dhe Arbër Çekaj të kenë qenë bosët e mëdhenj të trafikut të 613 kilogramëve kokainë nga Kolumbia në Durrës e më tej në Europë.
Policia i ka dërguar materialet në Prokurorinë e Krimeve të Rënda të Tiranës, por kjo e fundit mbylli hetimit për mos gjetje elementesh të veprës penale.
Sipas Prokurorisë nuk kishte lidhje të pronarit të mallit me kokainën që ai thoshte se nuk kishte dijeni.
Por kapja e gjysmë tonit kokainë në Maminas, pikërisht në magazinën e Arbër Çekajt, pasi u zbulua në portin e Durrësit, hapi “kutinë e Pandorës” e cila tani nuk ka më të ndalur.
Rasti i Spanjës
Sërish kokainë në Spanjë e sërish shqiptarët. Policia vendase kishte ndërmarrë një tjetër operacioni ku është kapur një grup që trafikonte drogën e fortë.
Sipas të dhënave, u sekuestruan 86 kilogram kokainë në një automjet në Malaga, të futura në valixhe. Policia arrestoi 4 shqiptarë pjesë e një grupi të rëndësishëm trafiku.
Spanja është rikthyer në një qendër të veprimtarisë së mafia-s shqiptare.
Disa javë më parë, DEA dhe policia spanjolle goditën një grup shqiptar, duke sekuestruar 1 ton kokainë si dhe 1.5 milionë euro cash. Operacioni u finalizua edhe me arrestimin e dy shqiptarëve, Julian Deblini dhe Arjan Ndoci.
Rasti në Gjermani
E përditshmja më e madhe gjermane Bild, ka publikuar një raport të plotë për 1.8 ton kokainën e kapur në portin e Hamburgut në ngarkesën e bananeve.
Gazeta gjermane bën të ditur se rreth 500 forca policie kanë marrë pjesë në aksionin që nisi prej një viti.
Policia gjermane ka zbuluar skemën së bashku me agjentët e DEA-s që kanë bashkëpunuar në origjinën e blerjes së kokainës, në Kolumbi dhe Ekuador.
Kokaina dërgohej nga Kolumbia në Ekuador dhe atje instalohej në ngarkesën e bananeve. Më pas, sapo mbërrinte në Hamburg ajo lëvizte për në Bavari ku u arrit të zbulohej një rrjet i gjerë shpërndarjeje që funksiononte në supermarketet e vogla të lagjeve në disa qytete.
Policia gjermane mban ende të fshehtë identitetin e të arrestuarve, pasi operacioni është në zhvillim e sipër. Prokurori Thomas Steinkraus-Koch ka bërë të ditur se 12 personat që gjenden në paraburgim i përkasin moshës nga 21 deri në 51 vjeç.
Identitetin nuk e bën të ditur as njëri prej avokatëve, i cili flet për Bild. Dimitrios Kotios, avokati mbrojtës i njërit prej të arrestuarve deklaroi se klienti i tij nuk ka pranuar akuzën. Sipas tij, ai nuk ka qenë në dijeni të ngarkesës me kokainë që ishte fshehur në banane.
Pra sipas të gjitha gjasave, i arrestuari që mbron Kotios është pronari legjitim i ngarkesës me banane. Sërish një koençidencë me kokainën e kapur në Maminas.
Tani prokuroria gjermane po gjurmon pasuritë dhe asetet e ardhura nga shitja e kokainës, ndërkaq, Bild ka publikuar foton e një vile ku grumbulloheshin bananet dhe kokaina.
Rasti në Holandë
Deri më tani DEA ka goditur katër banda mafioze shqiptare të kokainës. Rasti më i fundit ishte një grup shumë i fuqishëm që vepronte në Belgjikë dhe Hollandë.
Në një operacion të përbashkët që DEA dhe Europol kanë zhvilluar në qytetin e madh belg Antverpen, është arritur të sekuestrohet rreth 313 kilogram kokainë dhe është kapur pjesa më e madhe e grupit.
Grupi që vepronte në portin më të madh të Belgjikës, mësohet se kontrollonte tregun e Francës dhe Belgjikës, si dhe një pjesë në Hollandë.
Kokaina e fshehur në arka bananesh kishte ardhur nga Amerika Latine me një ngarkesë më të vogël. Ajo më pas ishte magazinuar në një ndërtesë në qytetin e madh port të Belgjikës, ku u zbuluan provat e tjera të bandës shqiptare.
Numri i të arrestuarve po mbahet sekret për arsye hetimore, por siç mësohet bëhet falë për një grup që ka lidhje me tre operacionet e tjera: atë të Maminasit, atë të Spanjës dhe të Gjermanisë, ku u kapën tonelata drogë të fortë.
DEA, e cila komandon sulmet për ditën dhe kohën e duhur të operacionit, dyshon se goditjet e fundit që u dhanë ndaj eksportuesve shqiptarë të kokainës kanë bërë që trafikantët ta lëvizin atë me sasira më të vogla.
Kjo pasi grupi që është goditur në Antverpen është i fortë dhe i rëndësishëm thuajse njësoj me ata që u arrestuan në Madrid dhe në Hamburg.
Sipas policisë belge që ekzekutoi dhe bashkërendoi operacionin, kokaina ishte fshehur në 15 kuti bananesh dhe kapte vlerën e 16 milionë eurove.
Shqiptarëve ju janë kaur vetëm 50 mijë euro cash, si dhe të gjitha makinat dhe dy motoçikleta që u gjendën në banesën ku u zhvillua operacioni.
Gjithashtu në banesën ku u kapën krerët e bandës shqiptare, u gjet edhe një serë e madhe e kultivimit të kanabisit, ku mbilleshin kryesisht fidanët e mariuanës.
Hetimet për bandën shqiptare kanë nisur që në shtatorin e vitit 2016, kur në një ditë në të gjithë Europën, Europol arrestoi 36 baronë shqiptarë të drogës. Pas atij operacioni të madh, ky është aksioni i dytë, tashmë me synimin për t’i shpartalluar përfundimisht këto banda.
Ndërkaq, policia gjermane ka publikuar emrat e të arrestuarve në operacionin ku u sekuestrua 1.8 ton kokainë.
Emiljan Hysenaj dhe Dashamir Ndoj, duket se janë krerët e kartelit shqiptar të Bavarisë, i cili kontrollonte shpërndarjen në një rrjet në jug të Gjermanisë.
Në Tiranë ka mbërritur një grup i policisë dhe i prokurorisë gjermane, të cilët dje janë takuar edhe me ministrin e Brendshëm Fatmir Xhafaj, takim ku ishte prezent edhe ambasadorja gjermane në Tiranë.
Agjencia amerikane e Antidrogës, mendon se të gjithë të arrestuarit në operacionet e fundit nuk ka gjasa të jenë koka e vërtetë e trafikut gjigand të kokainës; ata janë thjesht ushtarë të një megaorganizate që është bashkuar prej kohësh dhe është bërë shumë e fuqishme.
Përgatiti TIRANA TODAY
