Një 33-vjeçar është arrestuar nga Policia e Shkodrës pasi u kap në flagrancë gjatë tentativës për të vjedhur me armë një banesë në Dajç te bregu i Bunës.
Policia thotë se Sokol Dedaj ishte mbajtur nën vëzhgim prej disa muajsh. Në momentin që 33-vjeçari shkoi të vidhte banesën e 63-vjeçares me iniciale T.V., ndërhynë forcat e policisë duke e arrestuar.
Në momentin e kapjes, Sokol Dedajt iu gjet dhe iu sekuestrua një kallashnikov me një krehër me fishekë. Ai akuzohet për vjedhje me armë dhe armëmbajtje pa leje.
