Autoritetet spanjolle kanë shkatërruar një bandë mafioze shqiptare në Madrid. Në sajë të një operacioni, policia vendase në bashkëpunim me DEA-n amerikane dhe Europol, kanë bërë të mundur sekuestrimi i një sasie rekord kokaine prej 1 ton, si dhe një shumë prej 1.550.000 eurosh. Ndërsa nga të dhënat bëhet e ditur se në pranga kanë përfunduar 5 persona, mes tyre edhe lideri i këtij grupi kriminal.
Ndër të tjera thuhet se ata transportonin sasi të mëdha kokaine nga Kolumbia për në Spanjë me fluturime charter, duke u hequr sikur ishin një kompani që ofronte transport.
Ndërkohë në total policia ka sekuestruar 790 pako me kokainë, disa automjete shumë kubikëshe, telefona dhe karta identiteti false, si dhe municione.
Por, lidhur me bandën thuhet se hetimet nisën në Nëntor, kur autoritetet zbuluan ekzistencën e saj. Ajo ishte e përbërë nga shqiptarë dhe kishte lidhje të ngushta në Spanjë.
Shqiptarët transportonin sasi të mëdha kokaine që vinte nga Kolumbia me anë të avionëve të vegjël. Ata e përdornin Spanjën si portë hyrëse për drogën, e cila kishte destinacion vendet e Europës.
Në mesin e 5 të arrestuarve, emrat e të cilëve nuk bëhen të ditur, janë 2 shqiptarë, 2 spanjollë, si dhe lideri i organizatës me kombësi kolumbiane.
