Me mijëra rumunë kanë marrë serish pjesë në një tubim anti-qeveritar në kryeqytetin e Bukureshtit, një ditë pas përleshjeve që lanë më shumë se 400 vetë të plagosur.
Sipas njoftimeve të mediave lokale, protestat deri më tani kanë qenë të zhurmshme, por paqësore. Ndërkohë që demonstrata të tjera të ngjashme po mbahen edhe në qytete të tjera si Cluj, Sibiu, Timisoara dhe Iasi.
Të premten, më shumë se 50,000 njerëz dolën në rrugë kundër asaj që ata e përshkruan si korrupsion të ngulitur dhe paga të ulëta. Shumë prej demonstruesve janë emigrantë rumunë që janë kthyer nga e gjithë Evropa për të shprehur zemërimin e tyre ndaj qeverisë.
Ata udhëheqin tubimet pasi thonë se u detyruan të largohen nga vendi për shkak të korrupsionit.
Disa oficerë policie u lënduan ditën e premte, pasi disa protestues hodhën shishe drejt tyre dhe policia përdori gaz lotsjellës dhe ujë me presion.
Ndërkohë, presidenti i vendit, Klaus Iohannis deklaroi se reagimi i policisë ishte “joproporcional”.
Unë dënoj fuqimisht ndërhyrjen brutale të policisë gjatë trazirave, sidomos kur nuk është proporcionale me veprimet e shumicës së njerëzve.”
Demostruesit nëpër rrugët e Bukureshtit kanë kërkuar dorëheqjen e qeverisë rumune të Social-demokratëve. Shumë rumunë që jetojnë jashtë vendit janë kthyer në shtëpi për t’iu bashkuar protestave.
“Na duhet ndryshim… Duhet të ndryshojmë politikanët, qeverinë, sepse të gjithë ata janë të paaftë të bëjnë diçka të mirë për ne. Ata mendojnë vetëm për veten e tyre. Nuk do të dorëzohemi deri sa diçka të ndryshojë, deri sa ata të na japin shansin për një jetë më të mirë”, thotë një protestuese.
Pas protestës së të premtes, kur pati edhe përleshje të dhunshme dhe 450 persona u lënduan, njerëzit tani janë akoma më të motivuar.
“Jam këtu sepse nuk dua që të mbizotërojë frika në shoqërinë rumune. Ky është shansi ynë i fundit; protestoni me ne”, thotë një tjetër protestuese.
Social-demokratët në Rumani kanë hedhur poshtë apelet për zgjedhje të reja, duke thënë se protestat nëpër rrugë nuk duhet të lejohen të rrëzojnë qeverinë e zgjedhur në mënyrë demokratike.
Por duket se edhe protestuesit nuk e kanë ndër mend të dorëzohen dhe pas natës së dytë radhazi të manifestimit, ata planifikojnë të radhës…
