Të paktën 2 të vdekur dhe dëmtime katastrofike, ka shkaktuar një valë e motit të keq, nisur nga e premtja, që ka përshkuar krejt Ballkanin dhe sidomos Turqinë. Dëmet më të mëdha raportohen në Antalia të Turqisë, ku furtuna u shoqërua me një tornado të frikshme, aspak e zakontë për këto rajone.
Tornado u filmua duke goditur aeroportin e Antalias. Pamjet dëshmojnë tmerrin që përjetojnë udhëtarët e hipur në një autobus në pistën e aeroportit, ndërkohë që një tjetër autobus ishte përmbysur.
Sipas mediave turke, 12 persona që gjendeshin në një autobus u lënduan, ndërkohë që tornado për pak sa nuk përmbysi disa avionë pasagjerësh.
Sipas autoriteteve, një Airbus A321-231 dhe një Boeing 737-MAX8, u dëmtuan pas stuhisë së fuqishme. Veç kësaj, u dëmtuan edhe dy autobusë, dy minibusë, 2 ashensorë aeroplanësh dhe një helikopter policie.
“Një uragan kaloi përmes aeroportit duke goditur një autobus që po transferonte udhëtarët në një aeroplan. Si rezultat, 12 persona u lënduan”, i tha guvernatori i provincës së Antalias, Munir Karaloglu për mediat. Gjithsesi aeroporti nuk u mbyll. TIRANA TODAY
