Shqipëria, nuk mori as ketë herë çeljen e bisedimeve të anëtarësimit me Bashkimin Evropian. Rezistenca e disa vendeve me në krye Francën, i shtyu minimalisht ato për vitin e ardhshëm.
Komisioni Evropian vlerësoi disa arritje, por përmendi si pengesë serioze trafikun e drogës dhe korrupsionin e madh. I sikletosur, Edi Rama shpalli në mënyrë komike fitoren, meqë vendit gjithsesi iu dha një farë date.
Lulzim Basha nxitoi të përfitojë politikisht, duke parashikuar që negociatat s’do të hapen as vitin e ardhshëm. Brukseli thotë se deri në çeljen e bisedimeve zyrtare, do të nisë me Tiranën punën përgatitore.
Pra na jep mesazhin se pavarësisht të gjithave, ka ende “dritë” në fund të tunelit. Çështja është se kush do të na nxjerrë matanë tij? Trafiku i drogës, pastrimi i parave, korrupsioni sidomos në nivele të larta, është në lulëzim të plotë.
Në mandatin e dytë, qeveria Rama po konsumon më shumë energji në menaxhimin e skandaleve, se sa në qeverisjen e vendit. Opozita është e dobët, e kapur, dhe në horizont s’ka asnjë alternativë të re serioze politike.
Ndaj, edhe nëse çelen negociatat vitin e ardhshëm, Shqipëria do të vazhdojë të qëndrojë për një kohë të gjatë në “paradhomën” e BE-së.
TIRANA TODAY
