Në kinematë gjermane po shfaqet një film dokumentar, i titulluar “Deportation Class”. Tematika e filmit në fjalë është dëbimi i azilkërkuesve shqiptarë.
“Ata vijnë natën, i shkëpusin nga gjumi dhe i vendosin në aeroplan: komandot speciale të policisë dhe të autoriteteve për të huajt, gjatë vitit 2016 kanë dëbuar nga Gjermania 25 mijë azilkërkues”, kështu nis prezantimi i filmit dokumentar, i cili zgjat 85 minuta.
Ai përmbledh gjithë ecurinë, nga planifikimi i një dëbimi kolektiv, te aksioni i madh policor i natës në banesat e azilkërkuesve e deri te arritja e atyre në vendin e prejardhjes.
Regjisorët Carsten Rau dhe Hauke Wender kanë pasur mundësinë të filmonin një dëbim të tillë kolektiv, bëhet fjalë për rastin e dëbimit të përnjëhershëm të 200 azilkërkuesve në Shqipëri.
Me tablo tronditëse, filmi regjistron jo vetëm një pamje precize të këtyre dëbimeve të natës, por u jep një zë dhe një fytyrë atyre njerëzve të cilëve nuk u jepet fjala në lajmet e televizionit: njerëzve që po dëbohen.
Njerëz si Gëzimi, i cili kishte shpresuar për një të ardhme më të mirë të fëmijëve të tij në Gjermani dhe tash duhet të shikojë i pafuqishëm se si i shpartallohet ëndrra. Ose familja e Elidorit dhe Angjelës, të cilët qenë detyruar të iknin nga gjakmarrja dhe pas dëbimit në Shqipëri përplasen në humnerë.
https://youtu.be/JOhKMOKHlyA
