Shqipëria ka arritur të mposhtë 2 me 0 modestët e Lihteshtejnit, ndërsa trajneri Kristian Panuçi e ka nisur me “këmbën e mbarë” aventurën e tij me kuqezinjtë. Për t’i bërë këtë “dhuratë” menduan Odise Roshi dhe kapiteni Ansi Agolli.
Kuqezinjtë po vuanin për të gjetur golin, pavarësisht inkursioneve të shumta dhe goditjeve drejt portës dhe për rrjedhojë nuk prodhuan asgjë në pjesën e parë. Në pjesën e dytë, Shqipëria arriti të zhbllokojë shifrat ndaj skuadrës modeste të Lihteshtejnit.
Ishte Roshi ai që mundi të nxjerrë skuadrën nga stërmundimi për të gjetur golin e avantazhit. Ndërsa të dytin e vulosi kapiteni Ansi Agolli.
Në minutën e 54’ pas një goditjeje nga këndi, portieri i skuadrës kundërshtare, Jehle grushton topin, i cili përfundon në këmbët e Migjen Bashës. Ky i fundit e godet furishëm, por është Roshi ai që e devijon për t’i ndërruar udhë e për ta ndalur përfundimisht në rrjetë.
Në minutën e 77 është kapiteni Ansi Agolli që dyfishon shifrat pas një gjuajtje klasi që jashtë zonës. Një aksion i nisur që nga e djathta e fushës, topi harkohet për në zonë dhe përfundon në të majtë, ku gjendet Agolli, i cili këtë radhë përdor këmbën e djathtë, që është jo e preferuara e tij, por rezulton efikase dhe shtang portierin e Lihtenshtejnit.
http://www.dailymotion.com/video/x5z83vr
Shqipëria gjendet në grupin G ku me këtë rezultat renditet e treta me 12 pikë pas Spanjës dhe Italisë.
