https://www.facebook.com/tiranatodaycom/videos/330347287410015/
“Njerëz”, rubrika më e re e “Tirana Today” që startoi një javë më parë, vjen kësaj here me një tjetër personazh dhe histori krejt të veçantë.
Ndriçim Kita, i verbër prej më shumë se 30 vjetësh na rrëfen përpjekjet e tij për të siguruar jetesën përmes një dhuntie. Tingujt e fizarmonikës së tij, është e pamundur të mos i ketë dëgjuar kushdo që kalon në rrugën përballë Katedrales Ortodokse në Tiranë, aty ku Kita tenton çdo ditë përmes muzikës të zbusë sadopak shpirtrat e vrarë të shqiptarëve.
Një histori jashtëzakonisht frymëzuese që tregon se sa forcë ka njeriu brenda vetes nëse ka dëshirën dhe vullnetin për t’ia dalë mbanë.
Një njeri që jeton në errësirë por që i ndriçon shpirti, Kita ka arritur të gjejë forcën e brendshme për të përballuar jetën me gjithë vështirësitë që i ka sjellë. Dhe jo vetëm kaq, Ndriçimi është një njeri jashtëzakonisht pozitiv dhe i angazhuar edhe në përkrahje të gjithë personave si ai.
Veç përpjekjeve për të mbajtur familjen e për t’i garantuar jo thjesht ushqimin por dhe shkollimin 2 djemve të tij, Ndriçim Kita është dhe kreu i shoqatës së të verbërve “Shpresa Katolike Shqiptare”, dega Durrës ku lufton bashkë me anëtarët e tjerë për të ndërgjegjësuar institucionet shqiptare për nevojat e të verbërve.
Çdo javë, rubrika “Njerëz” nga Erjona Rusi do të sjellë përmes reportazheve të shkurtra personazhe të ndryshëm, të cilët, të parë përmes një lenteje tjetër dhe jashtë kornizës së kronikave të përditshme, tenton një qasje ndryshe ndaj problemeve sociale në shoqërinë shqiptare.
