Pas arrestimit të bujshëm të kryebashkiakut të Lezhës, Fran Frrokaj, ka dalë edhe videoja e momentit të arrestimit të tij. Kryebashkiaku i zgjedhur në 2015 si përfaqësues i Partisë Demokratike akuzohet për tjetërsim të pronave në bregdet, ndërsa dosja në ngarkim të tij është hetuar nga Prokuroria e Krimeve të Rënda.
Report Tv ka siguruar edhe pamjet e momentit të arrestimit të kryebashkiakut të Lezhës.
Në video duket Frrokaj teksa ecën në këmbë pasi ka lënë zyrën në Bashki, i shoqëruar nga pesë efektivë policie civilë, ndërsa pak metra më andej presin dy automjete të policisë.
Në pranga ka rënë edhe nënkryetari i Bashkisë, kreu i Hipotekës dhe dy juristë, ndërsa prokuroria ka lëshuar 23 urdhër-arreste. 5 janë vënë pranga, ndërkohë që janë në kërkim 18 të tjerë.
Të arrestuar:
Fran Frrokaj – Kryetar i Bashkisë Lezhë
Enver Hafizi – Nënkryetar i Bashkisë Lezhë
Gjelina Bacaj – Drejtore e Hipotekës
Eduard Lekaj – Jurist te Hipoteka
Armando Dakaj – Jurist te Hipoteka
Zbulohet skema e abuzimit me pronat, njësoj si në Kavajë
Edhe në Lezhë ka ndodhur e njëjta skema abuzimi me pronat, duke falsifikuar dokumentet dhe kthyer tokat ranishte në toka bujqësore me pronar dhe mbi to ndërtoheshin biznese të ndryshme, lokale, hotele dhe shtëpi banimi.
Mbetet për t’u përcaktuar roli i saktë i kryebashkiakut Frrokaj në tjetërsimin e pronave dhe ndërtimin e bizneseve në tokat me dokumente të falsifikuara. Të përfshirë në këtë skemë dyshohet se janë të përfshirë edhe punonjës të Prefekturës dhe Hipotekave.
PARALAJMËRIMI NGA XHAFAJ:
Duket se abuzimi me pronat në Lezhë ka qenë një çështje që hetohej prej kohësh, madje ajo u paralajmërua edhe nga ministri i Brendshëm, Fatmir Xhafaj.
Ky i fundit ka paralajmëruar arrestimin e bujshëm të Frrokajt, teksa më 15 shkurt deklaroi se ‘do të kishte arrestime lidhur me akuzat për abuzime dhe tjetërsime të pronave’, ndërsa më 17 shkurt nga qyteti i Lezhës, Xhafaj tha se ‘shumë shpejt përgjegjësit do të dilnin para drejtësisë’.
“Dua t’ju them që jam i shqetësuar, ua thashë edhe njerëzve të Policisë për disa abuzime që janë bërë me tokat këtu, me pronën publike, me vijën bregdetare në zonën e Lezhës posaçërisht. Besoj që hetimet që janë duke u zhvilluar, janë në proces, besoj që do të jenë eficiente, do të jenë të suksesshme. Janë hetime që po bëhen bashkë me Prokurorinë këtu dhe me Prokurorinë e Krimeve të Rënda. Dhe unë shpresoj dhe besoj fort që shkaktarët e kësaj batërdie do të vendosen përpara përgjegjësisë penale”,tha në atë kohë Xhafaj.
