Shembujt e modestisë dhe përulësisë, shihen shpesh tek politikanët në Perëndim. Dy ditë më parë, bëri bujë gjesti i kryeministri holandez Mark Rutte, që pastroi vetë kafen e derdhur prej tij në hollin e parlamentit.
Kryeministri ynë Edi Rama, është përpjekur të bindë Holandën të votojë pro hapjes së negociatave të anëtarësimit. Por ai është tepër larg sjelljes së homologut të tij, ashtu si Shqipëria larg standardeve të Holandës.
Rama e nisi punën si kryeministër, duke shkuar në Kryeministri më këmbë. Pas 5 vitesh, rrethohet nga një duzinë badigardësh, që nuk lejojnë t’i afrohet asnjë hallexhi.
Ai organizon shpesh takime me qytetarët, por nuk jep llogari për keqqeverisjen. Rëndom nxehet dhe i fyen ata që ia thonë të vërtetat e hidhura, ballazi apo në Facebook.
Ndërkohë trumbeton nëpërmjet ERTV-së së tij propagandën e sajuar me kujdes. Arroganca e Ramës është shtuar, teksa shqiptarët i dhanë vjet të gjithë timonin e qeverisë.
Dhe kur përballë ka një opozitë të dobët, plot zullume, e lehtësisht të shantazhueshme. Mjerisht, shqiptarët janë mësuar me udhëheqës arrogantë apo autoritarë.
Pas diktaturës, kanë mbajtur më qafë Sali Berishën, Fatos Nanon dhe Ilir Metën. Ne kërkojmë ndihmën e Evropës, kur në fakt duhet të ndihmojmë veten, duke i dhënë fund shkeljes me këmbë nga bajraktarët e politikës shqiptare.
TIRANA TODAY
