Legalizimi i marijuanës në Kanada, një ditë më parë, më 17 tetor, është pritur me entusiazëm të paimagjinuar nga qytetarët. Një video e publikuar nga CNN tregon shitjen e sasisë së parë të marijuanës në një market, menjëherë pas sekondave të para pas futjes në fuqi të ligjit.
Në pamje shihen njerëz të lumtur që sa duket, mezi presin të blejnë një sasi të vogël të barit magjik. Por ajo që habit më tepër është radha e gjatë e blerësve në rrugë, një panoramë që të kujton shqiptarët në vitin 1985. Në radhë për të parë për herë të fundit diktatorin Enver Hoxha.
Qëllimi kryesor i qeverisë kanadeze me legalizimin e marijuanës ishte që ti jepej fund pasurimit të krimit me përfitimet nga trafiku, e shpërndarja e jashtëligjshme e marijuanës, sidomos tek të rinjtë.
Sipas ligjit kanadez, qytetarët e këtij shteti mund të “Blejnë kanabis të freskët, kanabis të thatë, vaj kanabis, fara kanabisi, ose bimë të kanabisit nga shitësit me pakicë, të autorizuar nga provincat dhe territoret. Mund të posedojnë deri në 30 gramë kanabis të thatë me rregull ligjor, ose ekuivalent në formë jo të thata, për përdorim në publik.
Njerëzit kanë të drejtë të ndajnë deri në 30 gramë kanabis të thatë me persona të tjerë të rritur, e tëra kjo në mënyrë ligjore. Mund të kultivojnë deri në katër bimë kanabisi për familje (jo për persona), për përdorim personal, nga fara të licencuara ose fidanë nga një furnizues i licencuar.
Mund të prodhojnë produktet ligjore që përmbajnë kanabis në shtëpi, të tilla si ushqimi dhe pije, me kusht që tretësit organikë të rrezikshëm të mos përdoren për t’i bërë ato”.
