Ish-shefi i antidrogës, Dritan Zagani ka deklaruar sot në emisionin “Opinion”, se Saimir Tahiri hante drekë me Habilajt sa herë shkonte në Vlorë. Ai ka shtuar se Habilajt kujdeseshin për skafin 5 apo 6 metër që ishte në pronësi të Saimir Tahirit.
Zagani ka qenë një ndër njerëzit e parë që ka akuzuar Tahirin për lidhjen me drogën dhe vëllezërit Habilaj, kushërinj të tij.
Zagani: Unë jam një ndër të parët oficerë të anti-drogës në rrethin e Vlorës, ata kanë qenë kontigjent kriminal. Madje njohja personale e imja me ta ka qenë që në vitin 1998, të cilët merreshin me trafik droge. Ata kanë qenë mjaft aktiv në këtë trafik. Habilajt kanë hapur shumë biznese legale, në vitin 2010 kam marrë vesh se ata kanë hapur një biznes fruta perimesh që eksportonin në Itali. Ata përmes një kamioni bëni tregti me italianët.
Duke pasur shumë dyshime se si ka mundësi me një kamion të lodhur, ata bënin një jetë përrallore. Pikërisht ashtu siç jetojnë trafikantët e drogës në Shqipëri. Në Vlorë kishte shumë biznesmenë të ndershëm të cilët nuk jetonin në standardin e tyre, kurse këta shfaqnin një jetë super luksoze.
