Më në fund bizneset e ndershme, por edhe gjithë sektorët shtetërorë, nuk do të kenë gojë të ankohen nga kontrollet e inspektorëve. Kjo për shkakun se këto ditë procesi i inspektimit do të ndryshojë; ai do të paraqitet krejt transparent, i paralajmëruar dhe i filmuar.
Lajmi është bërë publik nga Inspektori i Përgjithshëm i Inspektoratit Qendror, Shkëlqim Hajdari, përgjatë minutazhit të emisionit STOP, të drejtuar nga Saimir Kodra dhe Gentian Zeneli.
Inspektorati Qendror shpërndau gjatë ditës së djeshme 600 iPad për të gjithë inspektoriatet (janë 15 të tillë gjithsej në Republikën e Shqipërisë) me qëllimin për t’i dhënë fund inspektimit me blloqe dhe për të nisur një praktikë të re, që do të jenë inspektimet online, siç e përmban edhe detyrimi ligjor.
Në një intervistë tijën për emisionin STOP, Kryeinspektori Shkëlqim Hajdari u shpreh i kënaqur me këtë realizim. Ai tha se metoda e re do të nisë zbatimin në terren në fillim të muajit dhjetor, pas një procesi trajnimesh dhe se teknologjia mundëson që kryeinspektorët të ndjekin dhe kontrollojnë në çdo çast punën e grupeve në terren.
Sipas ligjit, subjektet që do të inspektohen lajmërohen 7 ditë më parë, veç rasteve kur ka të dhëna për abuzim apo vjedhje, por edhe në këto raste inspektori duhet t’i ketë të provuara indicien apo shkaqet./ TIRANA TODAY
