Dy javë nga dita e votimit, Koalicioni i Vëzhguesve Vendorë ka tërhequr vëmendjen për informim të popullsisë, mbi numrin i veprave penale të cilat parashikojnë ndëshkime të konsiderueshme gjatë fushatës dhe ditën e votimit.
“Ka një lloj kaosi dhe çoroditje ku qytetarët nuk janë të informuar në lidhje me këto sanksione” thotë Gerta Metaj, drejtuese e këtij koalicioni. Sipas saj, “nuk ka pasur një publicitet, informacion dhe komunikim të drejtpërdrejtë për sa i përket reflektimit të ndryshimeve të Kodit të Procedurës Penale sidomos për procedurën zgjedhore”.
Ashpërsimi i kuadrit ligjor për shitblerjen e votës është shoqëruar dhe me atë për transparencën financiare, nga ku rezultatet pritet të verifikohen me shumë pas zgjedhjeve. Lidhur me këtë zonja Metaj thotë se “Për momentin nuk kemi kosto dhe nuk mund të themi se fushatat janë të shtrenjta apo të lira. Por si koalicion e kemi në fokus se çfarë do të ndodhë me relatimet e partive politike”. Meta vëren se këtë radhë fushatat zgjedhore kanë qenë të qeta pa banderola, reklama apo postera.
