Prej vitit 2015, katër burra bëjnë shërbim roje 24 orë në ishullin e pelikanit për të mbrojtur këtë shpend të rrallë, që shkoi deri në prag të zhdukjes, por që sipas punonjësve të parkut i ka dyfishuar numrat në dy vitet e fundit. Pas vitesh gjuetie të pakontrolluar, laguna është bërë me roje që tani thonë se kujdesen edhe për qetësinë e shpendëve. Studiuesit tanë thonë: “Çdo zhurmë afër ishullit, largon pelikanët nga vezët e tyre. 7 minuta është koha kur veza mund të qëndroj në rrezet e diellit dhe nëse pelikani nuk kthehet sërish në fole, brenda kësaj kohe embrioni ngordh, dhe veza kthehet llukë”
Punonjësit vëzhgojnë me dylbi çdo lëvizje të pelikanit prej kullës së vrojtimit, nga ku mbajnë nën kontroll ishullin e pelikanëve dhe një platformë artificiale, si ishull i dytë, të ngritur afër tij për të shtuar numrin e foleve. Punonjësit vëzhgojnë për varka peshkatarësh apo turistësh.
Në vitin 2002, si pasojë e ndërhyrjes së njerëzve, kryesisht peshkatarë në lagunë, numri i çifteve të pelikanëve u ul në 17. Kjo rrezikoi deri me zhdukje pelikanin. Ndërkohë në tre vite me ndihmën e një fondacioni zviceran, u punua fort dhe u ngrit shërbimi rojeve me kulla vrojtimi, për të mbrojtur shpendin e rrallë.
Katër punonjësit ruajnë ditë e natë lagunën dhe sidomos ishullin. Kjo pasi foletë mund të dëmtohen dhe vezët e pelikanit merren edhe si hajmali. Persona të pa përgjegjshëm i vendosin si relike zbukurimi apo i shesin si suvenire.
Zona është me fat që nuk ka guida turistike për këtë periudhë të vitit. Imagjinoni se çfarë do të ndodhte nëse do të kishte lëvizje turistësh me varka në Ishullin e Pelikanit. Sot janë 100 vezë në pritje të daljes së zogjve të rinj. Ndërsa në riprodhim janë 110 pelikanë.
